JIRA
Abisua
Egunero edo ia, baita nafar politikaz idazten dudanean ere, irakurtzen nauzuenoi aurretiaz abisatzea egokiena iruditu zait. Egunkari honen arduradunekin hitz egin ondoren adostu dugu bihartik aurrera performance aldarrikatzaile xume bati ekitea: zutabe hau gaztelaniaz agertzen hasiko da. Jendea kexatuko da, naski. Holakorik euskarazko berripaper bakarrean. Komisiones ala Ugete sindikatuak berehala aterako dira nire alde, hizkuntza txikiak handia zapaltzen duelako kopla zaharra zabalduz, desagertzeko arriskuan denak nazioartean mintzatuenetakoa arriskuan paratzen duelakoa sinetsaraziz, nire jarrera kritikatzen dutenak integrista hutsak direla iradokiz. Ez dut epaitegietara jotzea baztertzen. Euskara inon eskatzearena ez dute ongi eramaten epaileek eta, logika osoz, euskal irakurleek euskaraz irakurri nahi izatearen pretentsioa gehiegizkotzat joko dute; azkenean eskubide pertsonalak direnez, nirea dago zuen guztienen gainetik.
Esperatzekoa da herritar asko erabaki honen kontra oldartzea. Erdaldun elebakarrak ere hiperbolearen indarrez zentzugabekeriaz ohartzea apartekoa litzateke, baina ez dut itxaropen handirik ere. Suerte pixka batekin atzerriko albistegietan sartzea lortuko dugu. Meme bihurtuta edo.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
