Albistea entzun

ATZEKOZ AURRERA. Xan Bidegain. Musikaria

«Maite dut Baiona festa giroan ikustea»

Bidegainentzat berezia da gaur Willis Drummondekin Baionako besten karietara emanen duen kontzertua, izugarri prezatzen baititu bestak, eta, gainera, bestetan gustukoen duen plazan baita, Patxan.
BOB EDME Tamaina handiagoan ikusi

Nora Arbelbide Lete -

2018ko uztailak 26 - Baiona

Hamar bat aldiz emanak ditu kontzertuak Baionako bestetan Xan Bidegain baxu jotzaileak (Baiona, 1980). Willis Drummondekin aritua da behin, eta gaineratekoak beste taldeekin, dela Los Cojonudos, Eelan edo Berri Beltzak taldeekin. Kontzertu gehienak, ostatuetan. Baina gaurko kontzertuak badu zerbait berezia: lehen aldia da Willis Drummondek Patxa plazan jotzen duela. Baionako gaztetxeak gonbidatu ditu, besta alternatiboan; 22:00etan dute kontzertua. Eta Patxa plazak badu garrantzia taldearentzat. Funtsean, hor dituzte kideek besta ordu anitz iragaten. Aurten, gainera, kontzertu bakarra dute besten denboran, eta Baionan da. Beraz, bost egunak egiteko perspektiban dago Bidegain.

Nolako gogoarekin igoko zarete taula gainera?

Besta memento on bat sortzeko gogoarekin, gure lagun asko etorriko baitira, eta, agian, baita zale batzuk ere. Beti bezala, publikoarekin batzeko asmoa izango dugu, agertokiaren eta publikoaren arteko barrera hausteko.

Patxa plazak haustura horren lortzeko aukera emanen dizue?

Pentsatzen dut. Historikoki, plaza alternatibo bat da. Garai batean, Patxakoek lan handia egin zuten ez gehiago izateko droga salmenta toki bat. Eta lan hori egina izan da. Orain, gazteek hor berean besta alternatiboa antolatzeko aukera izatea bikaina da. Askatasun toki bat da, eta horrek laguntzen du giroa hobetzen.

Zer duzu gustukoen Baionako bestetan?

Hemengoa naiz, eta badu 38 urte egiten ditudala. Gutitan huts egiten ditut. Bereziki maite dudana giro orokorra da. Maite dut Baiona ikustea festa giroan. Urtean zehar, leku beretan egoten naiz, baina urtean zehar ez dagoen giro bat bada bestetan. Jende asko-asko gurutzatzen dut. Batzuetan, urtean behin ikusten dudan jendea da. Bada askatasun aire bat: ez zernahi egiteko, baina bada zerbait. Ordutegirik ez da, hitzorduak bakarrik besta egiteko hitzorduak dira. Ez da lan egiteko hitzordurik. Ez da sekula ez berantegi, ez goizegi, jendearekin topatzeko.

Zerk egiten du giro bat ona eta beste bat txarra?

Urte luzetan lan egin izan dut Sankara ostatuan Baionako besten garaian. Ematen genuen musika ez zen frantses musika triste hori, eta jende asko etortzen zen musika entzutera. Eskertzen gintuzten ezartzen genuen musika onagatik.

Musikak anitz eragiten du?

Ostatuan musika kontrolatzeko xede bat bagenuen. Musika ez dadin izan bortitzegia, edo ez dadin izan reggaeton itsusi bat, super sexuala, edo musika frantses triste hori. Sebastien Patochen La Cartouche kantua hedatu zen urte batez, adibidez. Afrusa zen. Jendea horrelako musikekin askaraztea ez da egokia, nire ustez. Oro har, kalitate pixka bat ematen bada, bai edaten den alkoholean, bai espazioan eta bai musikan, jendea beste giro batera pasatzen da. Inportantea da ere sentiaraztea hemen nortasun berezi bat badela. Kanpotarrei adieraztea ez direla nonahi; ez direla ondoko diskotekan edo kanpineko bestan. Badela beste proposamen bat, beste errealitate bat.

Baionako auzapeza bazina, zer proposatuko zenuke bestentzat?

Hasteko, komun gehiago eta nonahi, eta behartuko nituzke ostatuak komunak zabaltzera. Proposatuko nituzke kontzertu gehiago: bada aski plaza. Azkenik, kanpoko ostatuak debekatuko nituzke kale hertsietan, karrikak ahal bezain irekiak izateko. Non dira gehienik gertatzen tentsio momentuak? Jendea metatzen delarik. Eta non metatzen da? Karrika hertsietan, bi kanpoko ostatuen artean. Sexu erasoak ere hor badira anitz.

Zer gomendatuko zenioke lehen aldiz Baionara heldu den euskaldun bati?

Lehen aldi batentzat, egunez etortzea. Ez baldin baduzu herria ontsa kontrolatzen, galtzen ahal baitzara aski fite gauaz. Baina lasaiki etortzea. Eta segitzea besta alternatiboen egitaraua, euskarari lotu animazio guztiak: Baionako bestak euskaraz bizi daitezke.

Zer gomendatuko zenioke lehen aldiz Baionara heldu den ez-euskaldun bati?

Ez dezala pentsa zernahi egin dezakeela. Errespetatzea tokia, bere burua eta ondokoarena. Zure burua eta zure ondokoarena zainduz gero, gauzak hobeki pasatzen dira. Horrek behartzen zaituelako kontrol puntu bat atxikitzera.

Anekdota ezkor bat?

Gogoan dut beti Poliziak kargatu zuelarik igande gau batez Patxoki aitzinean. Biziki bortitza izan zen; zaurituak, jendea ikaran...

Oroitzapen goxo bat?

Manu Chaoren Baionako bestetako kontzertuarena. Garai hartan, txaranga bat bagenuen: gaua amaitu genuen Txiriboga ostatu zerratuan Manu Chao eta bere lagunekin musika jotzen berandu arte.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Edorta Agirre. / ©Gorka Rubio, Foku

«Janari pista galduz gero, nahi duena salduko digu sistemak»

Miren Garate, Gipuzkoako Hitza

Janaren inguruan «gero eta desinteres handiagoa» ikusten du Edorta Agirrek, Amantala ta mantela liburuaren egileak. Dioenez, «zelofanez ontziratutako produktuek» hartu dute lehengaien tokia. «Horiek zer duten? Sinetsi egin behar, ez baitugu kriteriorik».

Sekulako giroa izan zen atzo Ondarroan, eguerditik hasita. ©URTZI URKIZU

'Azule', txingor euritan aurrera

Urtzi Urkizu

Bi urtez derrigorrez eten ostean, Zapato Azule jaia egin dute Ondarroan. Giro aparta izan da kaleetan, Dinamartxakoei ongietorria eman diete eta pentsiodunak omendu dituzte.
 ©ENDIKA PORTILLO / FOKU

«Niretzat, bertsoa terapia da; arazoren bat edukiz gero, bertsotan heltzen diot»

Amaia Ramirez de Okariz Kortabarria

40 urte igaro dira Arabako lehen bertso eskola sortu zutenetik, eta Lopez izan zen sortzaileetako bat. Ordutik, alboan izan du bertsoa, eta, eginiko lana eskertzeko, aurten berari eman diote Arabako bertsolari txapeldunari txapela jartzeko aukera.
Itziar Ituño aktoreak Malen Zubiri politikariarena egiten du <em>Intimidad</em> telesailean. ©DAVID HERRANZ / NETFLIX

'Intimidad', Netflixen gehien ikusi den telesaila, ingelesez bestekoetan

Urtzi Urkizu

Txintxua Filmsen fikzioa 58 herrialdetan sartu da Top10ean. IMDB-ko lehen 50etan kokatu da

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...