Albistea entzun

ATZEKOZ AURRERA. Joseba Gotzon. Musikaria

«Diaspora da Euskal Herriko zortzigarren probintzia»

Musika munduan ibilbide luzea dauka Joseba Gotzonek, eta horren zati handi bat Hego Amerikan. Hango euskal diasporarekin lotura estua sortu du, eta hari eskainitako proiektu bat aurkeztu du orain.
ARITZ LOIOLA / @FOKU Tamaina handiagoan ikusi

Jone Arruabarrena -

2020ko abenduak 9

Duela 36 urte hasi zen kantatzen Joseba Gotzon (Portugalete, Bizkaia, 1962), eta datorren urtean hogei urte beteko dira Hego Amerikan lehen kontzertua jo zuenetik. Hango euskal diasporaz zeharo maitemindu zen orduan, eta hainbat aldiz bueltatu da geroztik. «Argentinara hamabi aldiz itzuli naiz». Uruguai, Txile, Brasil, Mexiko eta Kuba ere ikusi ditu oholtza gainetik. Han ezagututako euskal diasporari omenaldi bat egin nahi izan dio orain atera berri duen Urrundik kantuan, bai eta izen bera duen birarekin ere.

Nondik sortzen da Urrundik kantua?

Euskal Herriko musikagintzaren egoera ikusita, pentsatzen nuen gure ibilbidea kanporatzeko beharra zegoela. Argentinara 2001. urtean joan nintzen, lehen aldiz, Niko Etxarterekin, eta hortik aurrera hasi nintzen beste herrialde batzuetara eramaten, baina, batik bat, Ameriketara. Bidaia horietan ezagutu nuen euskal diaspora, eta zer lan egiten duen gure nortasuna han ezagutarazteko.

Nola ikusten dute Euskal Herria diasporako euskaldunek?

Argentinara egin nuen lehen bidaia hartan, duela hogei urte, ez zegoen Internetik. Diasporako pertsona askok Euskal Herriari nostalgiaz begiratzen zioten, eta irudi oso idealizatua zeukaten, aitona- amonek kontatzen zietena oroitzen zuten: txapela, kaikua, baserriak... Kuriosoa zen. Lehen bidaia horretan, besteak beste, Paranan eman genuen kontzertu bat, eta, Euskal Herrira itzuli behar genuenean, malko artean agurtu gintuzten. Kuriosoa zen hango inor ez zela inoiz Euskal Herrian izana, baina benetan lotura estu bat sentitzen zuten.

Sentimendu hori adierazi nahi izan duzu Urrundik abestiarekin?

Bai. Oso espazio gutxi dago abesti batean hainbeste sentimendu adierazteko, baina uste dut azkenean lortu nuela. Buruan neukan beharrezkoa zela abesti bat egitea diasporako pertsonek daukaten euskal sentimendua ezagutarazteko. Hori, alde batetik; eta, beste alde batetik, nik haiek nola ikusten ditudan ere erakutsi nahi nuen.

Eta nola ikusten dituzu?

Batzuetan, esaten da euskal diaspora Euskal Herriko zortzigarren probintzia dela, eta ni guztiz ados nago horrekin. Zortzigarren probintzia horretan, nire lanak hemen baino gehiago ezagutzen dituzte; kuriosoa da. Duela 36 urte hasi nintzen kantatzen, eta, orduz geroztik, gauzak asko aldatu dira.

Zertan, adibidez?

Uste dut lehen interes handiagoa zegoela euskal kulturaren alde egiteko eta euskal kultura zabaltzeko. Orain, hemen kantatzean gustura sentitzen naiz, baina kanpora noanean baloratuago sentitzen naiz, han grina askorekin bizi baitute euskal kultura.

Kolektiboki egindako kantua da, gainera.

Bai. Niretzat oso garrantzitsua zen hogei urte hauetan ezagutu ditudan diasporako pertsona horiek proiektu honetan parte hartzea. Zerrenda bat egiten hasi nintzen euskaraz zekitenekin edo ikasten zebiltzanekin; azkenean, hogei pertsonak hartu dute parte.

Abestiaren izen bereko bira bat ere prestatzen ari zara.

Birak martxoan hasi behar zuen, baina bertan behera geratu zen. Oraingoz, Euskal Herrian eta Espainian hasiko naiz jotzen, urtarriletik aurrera. Udarako, Ameriketara joan nahiko nuke.

Eta zer kantatuko duzu bira honetan, Urrundik kantuaz gain?

Nortasuna izeneko disko bat atera nuen 1999. urtean, Gerra Zibileko Euskal Selekzioari buruz. Talde hartako jokalariek bira bat egin zuten Europan zehar, eta 1937ko urrian Mexikon erbesteratu zen ia-ia talde osoa. Haiek ere euskal diaspora izan ziren, eta gaur egun beraien seme-alaba eta biloba batzuek han segitzen dute.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Paco Rabanne, 2004ko argazki batean. / ©Montserrat T. Diez, EFE

Paco Rabanne diseinatzaile pasaitarra hil da

Edu Lartzanguren

Bretainiako etxean zendu da, 88 urterekin. Frankismoak erbesteraturikoen errefuxiatu kanpalekuetatik pasa zen, eta modaren inperio bat sortu zuen.

Emari jokoa ©EMARI

Emari: erreferenteak diren emakumeen inguruan ikasteko jokoa

Isabel Jaurena

Egunero, emakume baten izena asmatu behar dute erabiltzaileek, eta horretarako bost arrasto izanen dituzte.

 ©GORKA RUBIO / FOKU

«Bortxaketa salatzeko erabili dut musika»

Ane Insausti Barandiaran

'Medusa' izeneko EPa sortu du AyVeek, jasan zuen bortxaketa eta ondoren bizi izandakoak kontatzeko. Haren hitza zalantzan jarri zutela salatu du, eta ingurukoen babesari esker egin duela aurrera.
ETB1eko <em>Go!azen</em> telesaileko aktore gazteak. ©ETB

Hiru haurretik batek ikusi du aurten 'Go!azen' ostiraletan ETBn

Urtzi Urkizu

ETB1eko telesailaren denboraldia gaur amaituko da. Kontzertuek maiatzera arte jarraituko dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Jone Arruabarrena

Informazio osagarria

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.