Albistea entzun

ATZEKOZ AURRERA

Patxadaz mintzatzeko parada

Iruñerrian mintzodromoa antolatu dute lehenbiziko aldiz autobus geltoki zaharrean. 125 lagunek parte hartu dute, eta mahairik mahai ibili dira euskaldunak ezagutzen eta euskara praktikatzen.
Iruñean antolatutako lehenbiziko mintzodromoko parte hartzaileak mahaietan jarrita, proposatutako gaiez mintzatzen, atzo, geltoki zaharrean.
Iruñean antolatutako lehenbiziko mintzodromoko parte hartzaileak mahaietan jarrita, proposatutako gaiez mintzatzen, atzo, geltoki zaharrean. IDOIA ZABALETA / FOKU Tamaina handiagoan ikusi

Iker Tubia -

2021eko urriak 29 - Iruñea

Aspaldi ez dabil autobusik Iruñeko nasa zaharrean, baina atzo trafiko handia izan zen iluntzean. Nasara sartzeko ilarak lehenbizi, eta, behin sartuta, etengabeko joan-etorriak. Euskaldunak ziren: berriak eta zaharrak; poliki aritzen direnak eta oso ongi mintzo direnak. Mahairik mahai ibili ziren, autobideetako kaosaren pare batzuetan, euskaraz aritzeko asmoz. Hori zen atzoko helburua, aritzea. Nor bere mailan, bere geltokian, baina denak helmuga berera bidean: euskaraz bizitzea. Atzo patxadaz mintzatzeko parada izan zuten Iruñeko geltoki zaharrean.

Lehenbiziko aldia zen Iruñerrian mintzodromoa antolatzen zela, eta antolatzaileak kontent ziren erantzunarekin: 125 lagunek parte hartu zuten; batzuk kanpoan geratu ziren, toki faltarengatik. Euskaltegiak, hizkuntza eskola eta Mintzakide egitasmoa izan ziren ekitaldiaren antolatzaileak, baina euskaldun guziak zeuden gonbidatuak. «Pandemiarekin garai latzak pasatu genituen: elkartu gabe, talde babesa sentitu gabe... Ez zen motibagarria. Beraz, jendea animatzeko ekitaldia antolatu dugu, euskaraz lasai aritzeko», kontatu zuen Nekane Otamendi euskara irakasleak. «Elkarrekin eta elkarrez gozatzeko, berriro aurpegiak ikusteko eta euskara plazara ateratzeko egitasmoa da», gehitu zuen Kepa Yekora irakasleak. Biak aritu ziren antolaketan.

Poliki-poliki jendea mahaietan jarri zen. Bakoitzak bere izena zeraman paparrean. Aurrean txapa bat, botila bat ur eta mintzatzeko gaiak azaltzen zituen papera. Jarri ahala hasi zen mintzapraktika, nork bere burua aurkeztuta. Halako batean Pantxika Lamourrengana zuzendu ziren begiradak: «Ni euskaldun berria naiz, betirako. 18 urterekin ikasi nuen; orain berrogei pasa ditut, eta oraindik euskaldun berria naiz». Maskarek estaltzen zituzten begien zimurretan sumatu zitezkeen irriak. «Gaurkoa da Tinder edo Grindr, baina harremanak euskalduntzeko, eta manera analogikoan, ukitzen». Berehala hasi zen anabasa; aulkien jolasa. Bakoitzak zenbaki bat zuen, eta denek mahaiz aldatu behar izan zuten. Berriz hutsetik hasi behar: «Zu nor zara?» eta «Non bizi zara?».

Lehenbiziko aulki jokoa ez zen sobera ongi atera; bigarren eta hirugarrena izan zuten hobetzeko. 15 minutu izan zuten mahai bakoitzean hiru gai jorratzeko: Iruñerrian euskaraz aritzeko aukerez, turismoari buruz eta euskaldunek etorkinekin dituzten harremanez. Tonbola ere izan zuten tartean, sari dezenterekin.

Euskaldun berriak

Estibaliz Fernandez bilbotar gaztea euskara praktikatzera joan zen. B ereduan ikasi zuela-eta, orain hizkuntza eskolan ari da. Parean zuen Garbiñe Rekarte, euskaraz aritzeko toki berrien eske: «Nahiz eta lagun euskaldunak izan, kosta egiten da txipa aldatzea; gainera, beti badago euskara ez dakien norbait, eta, orduan, ez du inork euskaraz egiten». Horrelako egitasmo gehiagoren beharra aipatu zuen.

Alain Astibiak eta Rakel Azanzak euskaltegian izan zuten mintzodromoaren berri. «Euskaraz mintzatzeko etorri naiz; polita da egitasmoa», Astibiak. «Izugarri gustatzen zait euskarazko jardueretan parte hartzea; euskaraz egiteko, euskaldun gehiago ezagutzeko eta ongi pasatzeko etorri naiz», Azanzak. Hamabost minututan tokia aldatu zuten. Nasan trafikoaren harrabotsa aditu zen lehenbizi; denak esertzean patxadazko marmarra.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Arturo Campion euskaltegiaren 50. urteurrenaren besta, atzo. ©IÑIGO URIZ / FOKU

Beste hamaika istorio bizitzear

Yasmine Khris

IKA Iruñeko Arturo Campion euskaltegiaren 50. urteurrena kari, egun osoko besta egin dute. «Etxea» aurkitu zutela gogoratzera joan dira ikasle berriak, ikasle ohiak eta irakasleak.
 ©MONIKA DEL VALLE / FOKU

«Albokari izaera mitologikoa eman zaio: benetan, jotzea ez da hain gaitza»

Amaia Igartua Aristondo

Kantuak entzuten, eta partitura irakurtezinek lagunduta: hala ikasi du alboka jotzen Koteronek. Autodidakta izan da: tresnaren inguruan ezer gutxi egon denez, sortuz joan behar izan du, beste batzuekin batera. Filosofia irakaslea da ogibidez.
Paul Verhoeven zinemagilearen <em>Benedetta</em> filma (2021) euskarazko azpidatziekin ikus daiteke Movistar Plusen. ©BERRIA

Movistar Plusen 148 film azpidatzi zituzten euskaraz 2021. urtean

Urtzi Urkizu

Iaz, 31 telesailetako 279 atalen euskarazko azpidatziak jarri zituen plataformak. Konpainiak 2014an hasi zuen akordioa Jaurlaritzarekin

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.