BERTSOKLIKA

Doinua: Trumoia ortzi beltzean hoska

Nekazaria, neo-hipsterra,
runner guayena, senez alferra,
aditz trinkoen militantea,
K-rekin duena gerra,
euskaltegiko marjinatua,
gela barneko liderra,
harri gaineko muskerra,
ta 1.120 taldetan
banatutako ezkerra.

Langabetua, kale-mimoa,
100 urteko andre irmoa,
behelainoak ere ilundu
ezin du(e)n optimismoa,
transak, bollerak, marikak eta
guztien algoritmoa,
pertsona anonimoa...
Denak, korrika, euskaraz josten
herri honen erritmoa.

Zoratutako jende erreka,
izerdi putzu den kamiseta,
buruak ezin ulertu duen
gorputzaren hausnarketa,
zipatutako kulero buelta,
'ttipi-ttapa' leherketa,
amets baten silueta...
Euskal Herria deitu ohi dugun
utopiaren maketa.