Albistea entzun

Euskal kazetariak formatzeko unibertsitate diploma Baionan

Aldizkako formakuntzan eginen da, eta bi urte iraunen du. UPPA, EHU eta IJBAk emanen dute, eta praktikak izanen dira hedabideetan
Erakundeetako ordezkariak, atzo, Baionan.
Erakundeetako ordezkariak, atzo, Baionan. GUILLAUME FAUVEAU Tamaina handiagoan ikusi

Ekhi Erremundegi Beloki -

2023ko apirilak 28 - Baiona

Euskaraz arituko diren kazetariak prestatzeko unibertsitate diploma abiatuko dute heldu den irailean Baionan. UPPA Paueko eta Aturrialdeko unibertsitateak, EHU Euskal Herriko Unibertsitateak eta IJBA Bordele-Akitania Kazetaritza Institutuak elkarlanean emanen dute, EEP Euskararen Erakunde Publikoak koordinaturik. Ikasleek Ipar Euskal Herriko hedabideetan eginen dituzte praktikak, euskaraz. «Hizkuntza politikaren ikuspegitik proiektu egituratzailea da», adierazi du Antton Kurutxarri EEPko lehendakariak. «Hedabideei esker, euskara egunerokotasunean entzungai, ikusgai eta irakurgai da. Hori dela eta, hedabideak hizkuntza antolamenduaren elementu saihetsezina dira».

Ipar Euskal Herriko hedabideekin osatutako lantalde bat sortu du EEPk azken urteetan, eta hortik atera da kazetari euskaldunak formatzeko beharra. Unibertsitate diploma pasatu nahi duen ikasleak profesionalizazio kontratua egin beharko du hedabide batekin, ondoren praktikak enpresa horretan egiteko; hedabidearen gain izanen da langilearen lansaria. Hedabidearen hizkuntza hautua edozein izanik ere, praktikak euskaraz izanen direla baieztatu du EEPk. Jadaneko hamar hedabide prest agertu dira ikasle posibleei kontratua egiteko. Ikaslearen formakuntza AFDAS erakundeak ordainduko du, eta EEPk 8.000 euroko laguntza emanen dio kontratua egiten duen hedabideari.

Ekonomikoki bideragarria izan dadin, gutxienez hamar ikasle behar dira formakuntza abiatu ahal izateko; gehienez ere hamabost onartuko dituzte. Bi urte iraunen duen aldizkako formakuntza izanen da: bi astez unibertsitatean arituko dira, eta sei astez enpresan. Zikloaren bukaeran, hiru eremutan gaitasun hartze bat segurtatuko die ikasleei: euskara, kazetari lanbidea eta lurraldearen ezagutza.

Hautagaitzak EEPn

Kazetaritza diploma hau ez da lizeotik atera berritan egitekoa; unibertsitate ziklo batean engaiatuak diren ikasleei begirakoa da, horiek lan mundura bideratzeko helburuarekin. Lanbidez aldatu nahi duen batentzat ere egokia izan liteke. Haatik, ez da jadanik kazetaritzan ari direnak prestatzeko pentsatua. Interesa duenak EEPrekin harremanean jarri behar du i.aguirrebarrena@mintzaira.fr helbidera idatzita.

Euskarazko B2 maila eskatuko diete ikasle hautagaiei. «Helburua da formakuntzatik ateratzean gutxienez C1 maila eskuratzea, ahal bada C2», esplikatu du Celine Mounole Euskal Ikasketetako irakasle ikerlariak. Ezagutzari bezainbat garrantzi emanen diote hizkuntzaren kalitateari.

Klaseak Baionako fakultatean emanen dituzte nagusiki, baina ikasgai batzuen behar teknikoek Bordelera (Okzitania) eta Leioara (Bizkaia) eramanen dituzte ikasleak. IJBAk emanen du multimedia kazetari izateko formakuntza orokorra; espezializazioa hedabide bakoitzean eginen du ikasleak. Bi urteko prozesuaren ondotik, hiru unibertsitateek aitortutako diploma emanen diete ikasleei.

Unibertsitate diplomaren onurak laudatu ditu EEPk. «Lurraldean euskarazko ekoizpen mediatikoen garapen perspektibei modu eraginkorrean erantzutea ahalbidetuko du», Kurutxarriren erranetan. «Kazetari euskaldunen belaunaldi berri baten formakuntza lortuko da, eta horrela euskarazko kazetaritza lanaren sendotzea eta garapena ahalbidetuko da».

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

 ©MAIALEN ANDRES / FOKU

«Arnasgune batzuek utzi diote hala izateari; hori irauli nahi dugu»

Irati Urdalleta Lete

Hiru lan ildo nagusi zehaztu ditu legealdirako: UEMAren hedatzea, ikerketa eta kulturartekotasun proiektuak. Hizkuntza politika «aurrerakoiak eta ausartak» galdegin ditu.
Vianako Erentzun ikastolako ikasleak, atzoko ekitaldian. ©BERRIA

Begirada komun bat ikastolentzat

Ion Orzaiz

Ikastolek hezkuntza marko orokor berria aurkeztu dute, Vianan. VII. batzarra eginen dute 2024an, etorkizuneko erronkak aztertzeko

Atzo Antiguan egin zuten kanpaldiko ekintza bat. ©IDOIA ZABALETA / FOKU

Egitarau zabaleko kanpaldia «etxebizitza eskubidearen alde»

Unai Etxenausia

Ehun-ek antolatu du kanpaldia. Turismoaren inguruko hitzaldi batekin hasiko dute eguna gaur

Tania Diez. ©Aritz Loiola, FOKU

«Kaleak ito, gaixotu eta hil egiten zaitu»

Iraia Vieira Gil, Bizkaiko Hitza

Goiztiri elkartearen azken kontaketaren arabera, ehun etxegabe inguru bizi dira Barakaldon. Baliabide falta ikusita, Eguneko Arreta Zerbitzua ireki zuen elkarteak 2011n. Tania Diez teknikariak dio leku gehiago behar dela.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...