La Bolsa Bilboko Udalaren aretoak ateak itxi dizkio Miguel Urban Unidas Podemoseko eurodiputatuaren La emergencia de Vox. Apuntes para combatir a la extrema derecha española (Voxen larrialdia. Espainiako eskuin muturrari aurre egiteko oharrak) liburuari. Ongi Etorri Errefuxiatuak plataformak eta Hitz & Hitz Fundazioak antolatu dute liburua aurkezteko ekitaldia, eta La Bolsan egin nahi zuten. Baina zentroak ez die baimenik eman. Plataformak eta fundazioak gertatutakoa salatzeko plazaratutako oharraren arabera, La Bolsak argudiatu du «udal zentroak» ez direla «gai hertsiki politikoez, erlijiosoez eta sindikalez» aritzeko tokiak.
«Zentsura» kasu bat dela salatu dute ekitaldiaren bultzatzaileek. Nabarmendu dute La Bolsan «modu jarraituan eta sistematikoki» antolatzen dituztela mahai inguruak eta hitzaldiak «izaera ezberdina duten elkarte sozialek», eta ekitaldi horiek «molde politikoa, sindikala edo erlijiosoa» eduki izan dutela. Oroitarazi dute, gainera, Europan eskuin muturrak eduki duen gorakadari buruzko hitzaldi bat eman zuela Urbanek berak La Bolsan, joan den urtarrilean.
EAJk agintzen du Bilboko Udalean. Andoni Ortuzar Euzkadi Buru Batzarreko presidenteak proposatu izan du Vox «ekuazio politikorik ateratzea». Planteamendu horri helduz, antolatzaileek galdera bat egin diote udalari: «Nola aterako ditugu, elkarte sozialok izendatu ere ezin baldin baditugu egin?».
Urbanek Hika Ateneoan aurkeztuko du liburua, bihar (19:30).
Bilboko Udalaren areto batek Voxi buruzko ekitaldi bati betoa jarri diola salatu dute
La Bolsak ateak itxi dizkio Miguel Urban UPkoak alderdi ultrari buruz ondutako liburua aurkezteari, argudiatuz ez dela «gai politikoetarako» lekua
Iruzkinak
Ez dago iruzkinik
Ordenatu