Albistea entzun

Orain dela 25 urte Filtron; abuztuaren 23an Hendaian

Mikel Arkauz - Askapena taldeko kidea

2019ko abuztuak 22

Hogeita bost urte igaro dira munduari Uruguaiko herriak emandako duintasun erakustaldiaren ondotik. 1994ko abuztuaren 24an, gertakari batek Euskal Herria eta Uruguaiko herria astindu eta bide batez bi herrien arteko harremana betiko elkartasunez lotu zituen. Milaka uruguaitar Filtroko ospitaleko ateetan bildu ziren Josu Goitia, Luis Mari Lizarralde eta Mikel Ibañez euskaldunei elkartasuna adierazteko. Haiek gose eta egarri greban zeuden borrokan, estatu espainiarrak beraien estradizioa eskatu ondoren. Era berean, han bildutakoek Uruguain aspalditik ezarritako asilo eskubidea mantendu zedin aldarrikatzen zuten. Poliziaren basakeriak bi hildako eta ehundaka zauritu utzi zituen Montevideoko kaleetan.

Orain, 25 urte igaro eta gero, eta ez soilik duintasunaren izenean, gertakari hura gogoratu eta omenduko dugu, urtero legez.

Gogoan izango ditugu eta omenduko ditugu Fernando Morroni eta Roberto Facal eta bortizki jazarriak izan ziren pertsonak, egiazko elkartasuna eta internazionalismoaren benetako praktika aurrera eramateagatik. Fernando eta Robertok dena eman zuten.

Gogoan izango ditugu eta omenduko ditugu duela 25 urte kalera irten ziren milaka uruguaitarrak. Arduraz, duintasunaz eta kontzientziaz, irmoki estatuen injustizia eta interes politiko zekenen aurka borrokatu zirenak.

Gogoan izango ditugu eta omenduko ditugu, gaur egun munduaren edozein txokotan inposatutako inperio kapitalista eta munduko ordena txikitzailearen errealitatea aldatzeko borrokan diharduten esperantza izpi guztiak.

Eta nola ez, gogoan izango ditugu eta omenduko ditugu Norma Morroni eta Filtroko martxa urtero antolatu eta hauspotzen duten kideak, benetako militantzia internazionalistaren adibide praktikoa eginez denontzako eredu eta ikur bilakatu direnak.

Era berean, gogoan izango ditugu, eta ez ditugu barkatuko Uruguaiko herriaren subiranotasunaren eta asilo eskubidearen aurka Estatu Espainiarrak egindako bortxaketa, poliziaren errepresioa eta erantzule politikoen inpunitatea.

Ekitaldia G7ren aurkako kontragailurraren barnean izango da. Duela 25 urteko sarraskiak ez du gaurkotasunik galdu; zoritxarrez, ez zen gertakari bakan bat izan. Gaur egun ere, nonahi ageri dira injustizia, inpunitatea eta eskubide urraketak sistematikoki. Gurean omenaldiei jazartzen diete, Espainiako eta Frantziako Estatuak eredu dira gizarte zibilari inpunitate osoz jazartzen. Negozioak agintzen du mundu osoan, gudaz konkistatzen dira merkatu berriak. Politikaren molde burges klasikoen agorpena gertatu dela edonon dago agerian. Demokraziarenak egin du. Botere ekonomikoak gainerako botere guztiak bahitu ditu; legegilea, exekutiboa, judiziala, mediatikoa. Herritarrak kontuan hartu gabe nazioz gaindiko erabakigune kapitalistek gobernatzen dute mundua, aberatsen nahierara egin eta deseginez, eraiki eta suntsituz, bere garro hiltzaileak planeta osora hedatuz. Hori ikusten ez duena zeharo ezjakina da edo itsututa dago.

Guk argi daukagu, duela 25 urte Uruguaiko herriak azaldu legez; inperialismoaren aurrean, internazionalismoa eta herrien independetzia aldarrikatuko dugu. Ezinbestekoa da. Herri guztietako matxinoen saretzea, elkartasuna eta borroka beharrezkoak izango dira orain eta etorkizunean.

Hau honela, herriari omenaldira bertaratzeko deia egiten diogu. Hilaren 23an 13:00ean izango da zita, Hendaiako portuan (Kaneta gunean). Ezin dugu hutsik egin.

Bide batez, bejoindeiela eta agur bat urtero-urtero, umiltasun osoz, Askapenako brigadetan parte hartu duten denoi! Bertan ikusiko dugu elkar.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Arrosarioa
 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.