'High Life'
Zuzendaria: Claire Denis. Aktoreak: Robert Pattinson, Juliette Binoche, Andre Benjamin, Mia Goth. Herrialdea: Frantzia - Alemania - Erresuma Batua - Polonia - AEB. Iraupena: 110 minutu.
Jakin-mina zegoen Claire Denisen Zinemaldiko parte hartzearekin. Frantziarrak ohiko presentzia du zinemaldi garrantzitsuetan, eta, Toronton izan ostean, Donostiara etorri izanak halako itxaropen izpi bat pizten zuen Sail Ofizialaren panorama hitsean.
Zoritxarrez, Donostian beste batzuetan gertatu izan dena —Gilliam, Boorman...— gertatu da berriro ere, zinemagile ezaguna Sail Ofizialean izan baita, baina ez bere obra handi batekin. Beste zinemaldietan pelikula baztertu dutelako izan ote da?
Pelikulaz pelikula berezko unibertsoa eraikitzen jakin izan du Denisek. Giza harremanen behatzaile fina, inor baino hobekiago ekarri du pantailara Afrika-kolonialismoa binomioa. High Life-rekin, berriz, oso bestelako unibertso batean sartu da, eta bidaia horretan galdu samar ibili da.
Minimalismoaren zientzia-fikzioa egin du, zapata kutxak diruditen espazio-ontziak erabiliz eta akzioa gelaxka eta korridore gutxi batzuetara mugatuta. Horietan bizi diren pertsonen artekoa da istorioaren ardatza, desiraren eta etsipenaren artean mugituko den koktel errepikakorrean.
Izan ere, ohi bezala, hori da Denisi jasotzea interesatzen zitzaiona, baina horretarako erabili duen aterkia ez da egokiena. Flashback-ek ez dute beren funtzio narratiboa beteko, eta elipsien gehiegizko erabilerak zulo beltz handi batera eramanen du filma.
