Albistea entzun

Espainiako Gorteetarako hauteskundeak. Biharamuna. Albert Rivera

Anbizioak jandako liderra

Hondoratzearen erantzukizuna hartu, eta Ciudadanosen buruak dimisioa eman du. Gontz alderdia izateari uko eginda eta ildo liberala alboratuta, espainiar nazionalistena izateko nahiak eraman du porrotera.
RODRIGO JIMÉNEZ / EFE Tamaina handiagoan ikusi

Igor Susaeta -

2019ko azaroak 12

Duela urte erdi eskas, apirilaren 28ko hauteskundeen ondoren, Albert Riverak eskura zuen PSOErekin gobernua osatzea, edo, gutxienez, hori baldintzatzea. Baina Ciudadanosen zuzendaritzak erabakita zeukan Pedro Sanchezi betoa jartzea. 57 diputatu lortu zituen Espainiako Kongresuan; bederatzi eskasera zuen PP, eta, gontz alderdiarena egitea baztertuta, oposizioko buru bilakatu nahi izan zuen. Kataluniako auzia katramilatu zenetik, geroz eta eskuinerago posizionatuta dago, eta, nahiz eta zuritu egin nahi izan dituen, autonomietan itunak egin ditu bai PPrekin, bai Voxekin. Paradoxikoki, haiekin lehiatu da eskuinaren eta eskuin muturraren botoa bereganatzeko, nor baino nor bortitzago, eta zentroa baztertuz onartutako borroka hori belarrondoko galanta jasoz galdu du. Jarrera horrek alderdia bera astindu du —dimisioak egon dira azken hilabeteetan—, eta beste hauteskunde batzuetan bipartidismoaren alternatiba liberal gisa aurkeztu zenean erakarritako hautesleak uxatu ditu. Apirileko bozekin alderatuta, herenegungo hitzorduan bi milioi eta erdi boto galdu zituen: 47 diputatu. Horrenbestez, Rivera alderdiaren lider betierekoak dimisioa eman zuen atzo goizean, bezperan emaitzen beroan iradokitakoa gauzatuz.

«Proiektu kolektibo bat arrakastatsua denean, liderrok jakin behar dugu arrakasta denona dela, baina porrotak liderrarenak dira», nabarmendu zuen azken hamahiru urteotan alderdi laranjaren burua izan denak. Alderdiaren zuzendaritzaren aurrean Madrilen egindako agerraldian, ia ordu laurden iraun zuen diskurtsoa eman zuen, eta ez zituen baimendu kazetarien galderak. «Ciudadanoseko presidente gisa dimisioa eman dut, proiektu honek bere etorkizuna aukera dezan; oraindik existitzen baita zentro politikoa». Ciudadanosek, ordea, aspalditxo alboratu zuen zentroa. Riveraren erabakiaren ondorioz, desegin egin dute zuzendaritza, eta, orain, gestora bat izendatu arte, Batzorde Orokorrak zuzenduko du alderdia, behin-behinean. Batzar ezohiko batean erabakiko dute zer bide ibili aurrerantzean.

Kataluniako nazionalismoaren kontra egiteko sortu zuten, Katalunian, 2006an, eta, neurri batean behintzat, azken bi urteotan egin duen nazionalismo espainiarraren aldarri muturrekoak hondoratu du. «Etorkizunik ez zuen plataforma bat zen; inork ez zuen konfiantzarik harengan», gogoratu zuen Riverak, atzo, alderdiaren sorreraz mintzatu zenean. La Caixan ari zen lanean, abokatu, eta 27 urte zituen. Aitortu izan du ordura arte PPri, PSCri eta CiUri emana ziela botoa. Nuevas Generaciones PPren gazte erakundeko militantea ere izan zen.

«Zentro-ezkerra» zen

Alderdiaren lehen batzar orokorraren arabera, «zentro-ezker ez-nazionalistaren espazioa» betetzeko beharra zegoen. Eratu zuten urte berean, molde efektistak baliatuz iritsi zen Kataluniako Parlamentura. Alderdiak kanpainarako erabili zuen kartelean Rivera azaltzen zen, biluzik, genitalak estaltzen: «Pertsonak bakarrik inporta zaizkigu» zen mezua.

Herritarrengana iristeko ahaleginean, mezu zuzenak lagunarteko hizkuntza moldearekin uztartu ditu, baina geroz eta nabariagoa zen jokabide zakarraz blaituz.

Eta, Katalunian bezala, Espainian ere lortu zuen presentzia instituzionala —40 diputatu, 2015eko hauteskunde orokorrean—, bipartidismoaren higadura aprobetxatuz eta Espainiako politikan «erregenerazioa» hauspotuko zuela eta gardentasuna bermatuko zuela hitzemanez. Halere, Ciudadanoseko kide izan direnek boterekeria eta alderdiko arauak haustea leporatu izan diote.

Iazko aurreneko hilabeteetan, Espainiako Auzitegi Gorena PP alderdi ustel bat zela adierazteko pronto zegoenean, eta ez zirudienean Sanchez presidente izatera heldu zitekeenik, inkesta batek adierazi zuen boto asmoari zegokionez Ciudadanos lehen indarra zela Espainian. Eta Rivera hazi egin zen; presidente izan zitekeela sinetsi zuen. Ordurako, berritutako estatutuen arabera, alderdi «liberal progresista» zen Ciudadanos; guztiz eskuinera joanda zegoela, alegia, eta pragmatismoa alboratuta. Apustu horrek galbidera eraman du. Bere igerilari garaiak gogoan, Riverak atzo adierazi zuen kiroltasunez jokatu nahi duela. «Etxean arduratsua izaten erakutsi zidaten; gauza bera egin zuten irakasleek eskolan, eta entrenatzaileek uretan».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Errusiako armadako tanke batzuk ariketa militarrak egiten Rostov eskualdean, iazko urtarrilaren amaieran. ©EFE

Neguak gerrari eragingo dio

Igor Susaeta

Elurrak, hotzak eta eguzki orduen urriak baldintzatuko dituzte guda zelaiko mugimenduak eta horien ondorioz sortutako abaguneei eman beharreko erantzunak.
Fernandez, azaroan, La Plata hirian egindako ekitaldi batean. ©DEMIAN ALDAY / EFE

Cristina Fernandezi sei urteko kartzela zigorra ezarri dio auzitegi batek

Mikel Elkoroberezibar Beloki

Ustelkeria leporatu diote, eta inhabilitazioa ezarri. Foruduna denez, Argentinako presidenteordeak babesa izango du 2023ko udaberrira arte
Indonesiako zigor kodearen erreformaren kontrako protesta bat, atzo, herrialdeko parlamentuaren parean, Yakartan. ©MAST IRHAM, EFE

Indonesiak urtebeteko espetxearekin zigortuko ditu ezkontzatik kanpoko sexu harremanak

Gorka Berasategi Otamendi

Parlamentuak zigor kodea moldatzea onartu du gaur. Erreformaren bidez, debekatu egin du apostasia, agintariak iraintzea eta aurrez abisurik eman gabe protesta egitea.

Raphael Warnock hautagai demokrata, iragan ostiralean egindako mitin batean, Savannah hirian (AEB). Botoen %49,48 bildu zituen lehen itzulian. ©JIM LO SCALZO / EFE

Demokratek arnasa gehiago nahi dute

Urtzi Urrutikoetxea

Senaturako hauteskundeen bigarren itzulia egingo dute gaur AEBetako Georgia estatuan. Demokratek irabaziz gero, bi aulkiren aldea izango lukete, eta maniobratzeko tarte handiagoa

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.