Espainiako Osasun ministro Salvador Illak neurri gehiago iragarri du zahar etxeen gaineko kontrola areagotzeko, kezka handia baitago koronabirusak zenbait egoitzatan izandako ondorioez eta egoiliarrei emandako tratuaz. Espainiako Gobernuak modua eman du autonomia erkidegoek esku har dezaten «baldintzak betetzen ez dituzten zahar etxeetan», eta zahar etxe guztiak autonomia erkidegoen ikuskaritzaren pean jarri ditu.
Illak nabarmendu du bi neurri horiek «bete beharrekoak» direla, eta autonomia erkidegoei dagokiela betearaztea. Bestalde, iragarri du lantalde berezi bat antolatuko dutela, Gizarte Gai, Osasun eta Defentsa arloko ordezkariekin, gaia aztertzeko.
Euskal Herrian ere kezka dago zahar etxeetako egoera dela eta. Nafarroan, Mari Carmen Maeztu Gizarte Eskubideetarako sailburuak esan du 51 egoiliarrek positibo eman dutela birusa detektatzeko probetan, eta herrialdean dauden 83 zahar etxeetatik hamabostetan topatu dutela gaixoren bat. Kezka dago batez ere Erruki Etxearen inguruan, Nafarroako zahar etxe nagusietako bat baita —530 erabiltzaile ditu—. COVID-19 kasu bat antzeman dute han, eta beste 71k sintomak dituzte. Erruki Etxeko erabiltzaile guztiak bakartu egin dituzte.
Gipuzkoako zahar etxeetan eta urritasunen bat dutenentzako zentroetan ere 50 positibo atzeman dituzte; Arabakoetan, beste horrenbeste. Gasteizko San Miguel zentroan, esaterako, 11 egoiliar hil dira, eta kasuak izan dira beste egoitza batzuetan ere. EH Bilduk eskatu dio ArabakoAldundiari bere gain hartzeko zahar etxe pribatuen kudeaketa.
Koronabirusa
Zahar etxeetan esku hartzeari atea zabaldu dio Espainiako Gobernuak
Nafarroako zahar etxeetan 51 pertsona daude birusak kutsatuta. Gipuzkoakoetan, berriz, 50
Iruzkinak
Ez dago iruzkinik
Ordenatu