Kataluniara hurbilduko dituzte sei preso independentista

Ortzeguna bitartean iritsiko dira Junqueras, Romeva, Sanchez, Cuixart, Forcadell eta Bassa

Mikel Rodriguez -

2018ko uztailak 3
Espainiako Gobernuak atzo baieztatu zuen preso dauzkaten Kataluniako sei buruzagi independentista haien herrialdeko espetxeetara eramanen dituztela. Oriol Junqueras Generalitateko presidenteorde kargugabetua da haietako bat. Behin-behineko espetxealdian daude guztiak, matxinada delituaren akusaziopean epaiketa egiteko zain. Joan den astean eskatu zuten Kataluniako kartzeletara hurbiltzeko, eta Barne Ministerioak atzo baimendu zuen hurbilketa. Pedro Sanchez Espainiako presidenteak adierazia du Kataluniako auziarekin aitzineko gobernuaren bertzelako jarrera bat hartu nahi duela, nahiz eta proposamen zehatzik ez duen egin oraindik. Tentsioa baretzea da haren helburuetako bat, eta joan den hilaren 18an erran zuen «arrazoizkoa» iruditzen zitzaiola presoak Kataluniara eramatea matxinada auziaren instrukzioa bukatu ondoren. Sanchez heldu den astelehenean elkartuko da lehenbiziko aldiz Quim Torra Kataluniako presidentearekin.

Espainiako Barne Ministerioak hainbat hedabideri baieztatu zienez, bihar eta etzi artean hurbilduko dituzte presoak. Zehaztu zuen, ordea, ez zuela datu zehatzik emanen, «segurtasun arrazoiengatik». Atzo hasi zuten hurbiltze prozesua. Lehenbiziko pausoa sei presoak Madrilgo espetxe bakarrean biltzea izan da. Junquerasez gain, hauek hurbilduko dituzte: Raul Romeva Atzerri kontseilari kargugabetua, Jordi Sanchez ANC Biltzar Nazional Katalaneko presidente ohia, Jordi Cuixart Omnium Culturaleko presidentea, Carme Forcadell Kataluniako Parlamentuko presidente ohia eta Dolors Bassa Lan kontseilari kargugabetua. Sant Joan de Vilatorradako presondegira eramanen dituzte Junqueras, Romeva, Sanchez eta Cuixart —Bartzelonatik 50 bat kilometrora—, eta Forcadell eta Bassa Figueresera —ipar-ekialdean, Bartzelonatik 130 kilometrora—. Kataluniako Justizia Kontseilaritzak hartu du haien ardura, presondegien kudeaketa Kataluniako Gobernuari baitagokio, eta eskumen hori berreskuratu baitu joan den hilean autonomia berrezarri ondoren.

Bertze hiru preso, zain

Bertze hiru preso independentistek, Joaquim Forn, Jordi Turull eta Josep Rull Generalitateko kontseilari kargugabetuek, gaur jakinen dute beren hurbilketa eskarien erantzuna.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna