Goizean goiz ekingo diote egunari, mugarriak ikustera joateko ibilbidearekin. Ibilaldia Gasteizko Plaza Berrian hasi, eta Miñao herrian amaituko da. Bertaratuek aukera izango dute gutxi gorabehera hamar kilometroko ibilbidean dauden mugarriak ezagutzeko. Ostean, Olarizuko zelaia ekintzaz josiko da.
Ibilaldiko izerdiei aurre egiteko, babarrun jana egingo dute Olarizuko mendi tontorrean,13:00etan. Arabako babarrun nabarra dastatzeko aukera izango dute bertaratzen direnek. Tripak bete ostean, berriz, Udal Gobernuko kideei harrera egiteko ordua izango da. Udal Txistulari Banda ere han egongo da.
Arratsaldeko bostetan, berriz, aukera ugari egongo dira: haur eta gazteentzako jolasak, erraldoi eta buruhandien kalejirak eta dantzaldiak izango dira. Esate baterako, Tximeleta taldea arituko da ingurua musikaz alaitzen. Ostean, herri kirolak eta euskal dantzak egongo dira.
Egunari amaiera emateko, berriz, Udal Gobernua erromeriatik itzuliko da, 20:00etan. Alboan izango ditu txistulariak, trikitilariak eta gaita jotzaileak. Azkenik, zezensuzkoa egongo da Plaza Berrian, jaialdiari amaiera emateko asmoz; 20:45ean izango da.
Olarizuko Erromeria
Etzi, 09:00etatik 21:00etara, Gasteizko Olarizuko zelaian.