Albistea entzun

Koronabirusa

Txertoen eskuragarritasun «unibertsala» eskatu du Von der Leyenek

Txertoek «arrazoizko prezioak» izatea nahi du Europako Batzordeak. Sendagai ekoizpena dibertsifikatzearen alde dago Brusela
COVID-19aren aurkako txertoaren patenteen liberalizazioa eskatzeko protesta bat, Bruselan.
COVID-19aren aurkako txertoaren patenteen liberalizazioa eskatzeko protesta bat, Bruselan. CLARA LOPEZ GAMEZ / EFE Tamaina handiagoan ikusi

Juanma Gallego -

2021eko ekainak 5

Mundu osoko herrialdeek txertoak «arrazoizko prezioetan» erosteko aukera izan dezatela bermatu nahi du Europako Batasunak. Ideia hori jomugan, MME Munduko Merkataritza Erakundeari proposamen bat helarazi zion atzo Europako Batzordeak. Agirian, «jabetza intelektualaren alorrean» ere aurrerapausoak emateko eskatu zien MMEko gainerako kideei, txertoen gaineko patenteen inguruan merkataritza arauek ezartzen dituzten muga zurrunak arintze aldera.

Datorren uztailean hastekoa da MMEren kontseilu orokorra, eta eztabaida nagusietakoa txertoei buruzkoa izango da. Data hori buruan, Europako Batzordeak nazioarteko merkataritza arautzen duen erakundeari hainbat eskaera egin zizkion atzo.

«COVID-19aren kontrako txertoen eta sendagaien ekoizpena handitzeko eta horien eskuragarritasun unibertsal eta justua» errazteko eskaria jaso dute agirian. Txertoen alorrean Europan bertan egindako lana nabarmendu du Europako Batzordeko presidente Ursula von der Leyenek, eta txertoen esportazioen gainean hartutako jokabidea eredutzat jarri du.

Gogorarazi du EBk baimena eman zuela Europan ekoitzitako txerto guztien erdiak esportatzeko. «Gure berehalako eta premiazko helburua da errenta txiki eta ertaineko herrialdeen bidezko eskuragarritasuna bermatzea, txertoak modu zabalagoan eta azkarragoan partekatzeko», argudiatu du. Alde horretatik, presidenteak ziurtatu du EBk «ekoizpena handitzen laguntzen» jarraituko duela. Hilaren 11n Londresen hastekoa den G-7 taldeko bilkuran helburu horiek lortzeko moduez mintzatuko dela aurreratu du Von der Leyenek.

Oraingo krisiaz harago, presidenteak esan du etor daitezkeen pandemietarako prestatzeko garaia dela. Besteak beste, ekoizpena dibertsifikatu beharraz hitz egingo du, baliabide horiek fabrikatzeko gaitasuna «herrialde gutxi batzuen esku» egon ez dadin. Modu berean, garabidean dauden herrialdeetan osasun azpiegituren «erresilientzia indartu» behar dela uste du Von der Leyenek.

Valdis Dombrovskis Merkataritza komisarioak bide beretik jo du: «Alde anitzeko erantzun komertzial irmoak bultzada handia eman diezaioke COVID-19aren aurkako borrokari». Ez du zehaztu, ordea, merkataritza alorreko erantzun horiek zertan gauzatuko diren.

Patenteak askatzeari dagokionez, ohiko zuhurtziaz mintzatu da Batzordea. Egindako proposamenean, ekoizleekin lan egitearen alde azaldu da, borondatezko akordioak erdieste aldera. Hauetan, patentea duen enpresa eta txertoa ekoitziko duena elkarlanean aritzen dira. Onartu dute pandemia garaian «zilegi» izan daitekeela derrigorrezko lizentzietara jotzea. Horietan, gobernuek merkatuan esku hartzen dute, eta, ordainduta ere, patentea duen enpresa behartzen dute informazioa askatzera.

Bestalde, EB «pozik» azaldu da hainbat enpresak hartutako konpromisoarekin. Pfizer, BioNTech, Johnson & Johnson eta Moderna enpresek konpromisoa hartu dute aurten 1.300 milioi dosi emateko errenta txikiko eta ertaineko herrialdeei. Errenta txikikoen kasuan irabazirik gabeko salmentak izango direla aurreratu dute; bigarren multzokoei, berriz, «merkeago» salduko dizkiete.

AstraZeneca, epaiaren zain

Baliteke aurki ebaztea txertoen harira Europako Batzordeak etxean bertan duen auzibide nagusia; izan ere, atzo epaiaren zain geratu zen AstraZeneca enpresaren kontra EBk jarritako salaketaren harira Bruselan egin den epaiketa azkarra. Europako Batzordeak eskatu dio enpresari ekaina amaitu baino lehen txertoaren 120 milioi dosi emateko. Enpresak dio 100 milioi baino ezin dituela ziurtatu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Pertsona bat COVID-19aren aurkako txertoa jasotzen ©Gorka Rubio/ Foku

Osakidetzak iragarri du 30 urtetik gorakoek hirugarren dosia har dezaketela gaurtik

Berria

Baliteke Araban, Bizkaian eta Gipuzkoan aste honetan bertan zabaltzea dosi gehigarria 18 urtetik gorakoei ere.

Ana Ansa (Geroa Bai), Jose Maria Aierdi Etxebizitza kontseilaria, Arantza Biurrun (PSN) eta Mikel Buil (Ahal Dugu), gaur, Iruñean, Nafarroako Parlamentuan. ©Jagoba Manterola / Foku

Alokairua arautzeko etxebizitza lege berria hitzartu dute Nafarroan

Joxerra Senar

PSNk, Geroa Baik eta Ahal Dugu-k lege proiektua erregistratu berri dute Nafarroako Parlamentuan. 2010eko legea berritu nahi dute, eta, besteak beste, alokairuen iraunkortasunerako indizea edo alokairu kontratuen erregistroa sortzea proposatu dute.

Ostalari bat osasun ziurtagiria egiaztatzen, artxiboko irudian. ©Guillaume Fauveau

Txertaketa agiria onetsi du Frantziako Parlamentuak

Oihana Teyseyre Koskarat

Zenbait diputatuk helegitea ezarri dute Kontseilu Konstituzionalean, eta ostegunean espero da haren erantzuna.

Protokolo berriekin «ikasgela guztiak irekita» ari direla esan du Bildarratzek

Protokolo berriekin «ikasgela guztiak irekita» ari direla esan du Bildarratzek

Arantxa Iraola

Lehengo astean 3.032 ordezkatze «kudeatu» behar izan zituztela esan du: «Egunean seiehun ordezkapen».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.