Albistea entzun

ARKUPEAN

Jaitsi bolumena, mesedez

Iñigo Martinez Peña -

2022ko azaroak 30

Munduan dagoen bolumena hirukoiztu egin da azken hogeita hamar urteetan. Horixe diote ikerketek: planetako dezibelak gorantz doaz! Entzun al da?! Oihukatu gabe ez dut uste erraza izango denik, poluzio akustikoaren askotariko eragileak dauzkagulako inguruan: kotxeak, autobusak, hegazkinak, hirietako obrak, turisten joan-etorriak, une oro piztuta dauden pantailak, gailu elektronikoen burrunba... Horra hor kapitalismoaren bozgorailu zalapartatsua.

Egungo bizimodu digitalak, adibidez, zentzu askotan sortzen du zarata. Interneteko zerbitzarien eta datu-base erraldoien gordelekuak tramankulu izugarri handiak dira: kablez beteriko bunkerrak. Eta, une oro piztuta daudenez, pilo bat berotzen dira, gehiegizko tenperaturek gailuak leherrarazteko beste. Horregatik, inguruan hozkailuak behar dituzte: hozkailu amaiezinen harresi batek babesten ditu. Baina hozkailuek ere etengabe piztuta egon behar dute, eta txistu moduko bat igortzen dute. Etengabe pairatutako txistu baten burrunba eroa salatzen hasi dira inguruko herriak.

Egokiena kaskoak jartzea al da kanpoko zarata horretaz babesteko? Jar ezazu musika belarriak tapatzeko; oso altu bada, hobe! Geure hiriburuetan, sarritan, irudi berezi hori ikusten da: bakoitza bere entzungailuekin, bere entzumen-burbuilan sartuta, isiltasunik gabeko existentzia zaratatsuan. Eta, entzungailuak kenduz gero, supermerkatuan, dentistaren itxarongelan edo telefonoaren beste aldean inortxo ere ez dagoenean, berdin-berdin, musikatxo bat dago beti airean, isilune izan zitekeen hori soinuz betetzeko.

Ni azkenaldian harritu egin nau jakiteak bizimodu hipermoderno honen zarata ez dela soilik lurrazalera mugatzen: itsaso barrenera ere heldu da, zoritxarrez. Egun, itsas hondoan petrolioa ote dagoen jakiteko, sistema berri bat erabiltzen da: aire konprimatutako lehergailuen teknika. Uretan barrena sekulako soinu-uhinak sortzen dituzte itsasoaren hondora zuzen-zuzenean doazen bonba horiek. 2.500 itsas miliatan zehar entzun daitekeen soinua!

Itsasontziak gau eta egun ari dira petrolio bila, hogei segundotik behin aire konprimatuaren karga bat jaurtiz. Kanporantz ez da ia ezer entzuten, baina ozeano barruan aldaketa akustiko ikaragarria sumatzen da. Giza belarriak jasan dezakeen dezibel kopurua erabat gainditzen du itsaspeko bizitzak jasotakoak. Uretan bizi diren animaliek, gainera, soinua belarriekin entzun beharrean, gorputz osoarekin hautematen dute. Gorputz osoan sentituko dute dardara, uhinen danbatekoa, nahasmena. Zein izango ote da horren ondorioa itsas bizitzan? Ergelkeria dirudi, baina, guk sortutako zarata, ez da lurrera murrizten jada: ozeanoak ere soinuaren infernuan murgilduta daude. Ura dugu bizitzaren jatorria, eta lehertu baino ez dugu egiten.

Horregatik, isiluneak babestu beharrean gaudela uste dut; musika bera ere soinuaren eta isiltasunaren arteko konbinazioa da. Isiltasuna partekatu eta dezibelak jaitsi: elkarrekin patxadaz hitz egiteko, norbere burua entzuteko, arretaz irakurtzeko, batera arnasteko, naturaren soinuak aditzeko, beste espezie bizidun guztiak ez erotzeko, entzundakoa ulertzen denbora hartzeko... Izan ere, zein da dezibelen bidez tapatu nahi dugun hutsunea?

Shakespearek, agian, arrazoia zeukan «bizitza zarataz eta amorruz beteriko ipuin bat» zela: ergel batek kontatutako ipuin zaratatsua. Asma ote genezake beste doinu bat bizitza kontatzeko, bizitzari kantatzeko? Nik, baxu-baxu bada ere, horixe kantatu nahiko nuke.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Arrosarioa
 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.