Albistea entzun

Jaurlaritzak berretsi egin du Euskaltelen akzioak erostea aztertzen ari dela

Eusko Legebiltzarrak gobernuari eskatu dio «analizatzeko» zer aukera duen. Akzioen %1 bakoitzak 16 milioi euro balio du gaur egun
Erkoreka eta Urkullu, atzo, Eusko Legebiltzarrean.
Erkoreka eta Urkullu, atzo, Eusko Legebiltzarrean. DAVID AGUILAR / EFE Tamaina handiagoan ikusi

Iker Aranburu -

2019ko azaroak 15

Euskaltelek beste akziodun bat izan dezake aurki: Eusko Jaurlaritza. Arantxa Tapia Ekonomiaren Garapenerako sailburuak onartu egin du telekomunikazio enpresaren parte hartzeak erosteko aukera «aspaldi» aztertzen ari direla. Ez du esan, ordea, noiz sartuko diren: «Erabakia jakinaraziko dugu erabakia hartzen dugunean. Tentuz jokatu behar dugu; ezin dugu egunero hedabideetan agertu erosiko al dugun ala ez esaten». Horrela erantzun dio Tapiak Euskaltelen esku hartzeko aukera «sakon analizatzeko» eskatu dion Eusko Legebiltzarraren proposamen bati.

Akziodun berri-berria ere ez litzateke izango Jaurlaritza, Gasteizko gobernua izan baitzen telefono konpainiaren bultzatzaile nagusia, 1990eko hamarkadan. Akziodunen artean izan zen 2012an bere zatia saldu zuen arte, telekomunikazio sarearekin batera. Baina, orduz gero, gauzak asko aldatu dira. Konpainia Kutxabanken kontrolpean utzi zuen Jaurlaritzak, eta Araba, Bizkaia eta Gipuzkoa zituen bere merkatua. Gaur egungo Euskaltel desberdina da. Askoz enpresa handiagoa da —kable bidezko telefoniako konpainia bat erosi du Galizian, eta beste bat Asturiasen, eta Nafarroan, Errioxan eta Katalunian ere zabaltzen ari da—, eta haren akziodun nagusia Zegona inbertsio funts britainiarra da (%21 ditu). Helburu bakar bat duen talde bat: Euskaltelen egindako inbertsioari etekina ateratzea. Nola egiten da hori? Euskaltelen akzioaren prezioaren igoaraziz eta beste norbaiti salduz.

Helburuen talka

Helburu horrek talka egin dezake Jaurlaritzaren eta euskal ekonomiaren interesekin. Batetik, Zegonak erabaki dezake Euskal Herriarekiko lotura txikitzea, dela egoitza beste leku batera eramanda, dela atzerriko hornitzaileak lehenetsita. Arazoa are handiagoa izango litzakete Zegonak konpainia sektoreko multinazional baten esku utziko balu.

Oraingoz horretarako asmorik ez duela esan du Zegonak, eta, keinu gisa, Xabier Iturbe Kutxabankeko lehendakariordea izendatu berri du presidente. Kutxabank akziodunik handienetan bigarrena da, %19,8rekin.

Zegonak Euskaltel salduko duen egunak, ordea, urrun dirudi. Dirua egin ahal izateko hamar eurotik gora egon beharko lukeelako Euskaltelen akzioa, eta atzo 8,9 euroan salerosi zen. Horrek esan nahi du ia 1.600 milioi euro balio duela Euskaltelek: akzioen %1, beraz, 16 milioi dira.

Euskaltelen errotzeari buruz kezka azaldu dute konpainiako sindikatuek eta alderdi politiko gehienek, batez ere Zegonako buruak esan zuenetik aztertzen ari zirela Euskaltelen ondasun inportanteena saltzea, zuntz optikoaren sarea.

Atzo, Jaurlaritzari akzioak erosteko eskatzen zion EH Bilduren proposamen bat iritsi zen Eusko Legebiltzarrera. Ez zuen aurrera egin, baina bai, ordea, aukera hori «aztertzeko» eskatu zuen EAJren eta PSE-EEren moldaketa batek. «Ahalegin bat eskatu nahi diogu Jaurlaritzari, errotzea are bermatuagoa gera dadin», azaldu zuen Luis Javier Telleria EAJko legebiltzarkideak.

Gobernuaren bikoaren zuzenketa onartu zuen EH Bilduk. «Aurrerapausoa da», Iker Casanovaren hitzetan. «Emaitzak frogatzen du EH Bilduren presioa Gobernua mugiarazten ari dela, zeren eta EAJ eta PSE, bai eta Jaurlaritza bera ere, pasatu baitira Euskaltelen ezer egiteko aukerarik ez zegoela esatetik, akzioak erostearen bidea aztertu beharrekoa dela onartzera». Casanovak akzioen %6 erosteko eskatu dio Jaurlaritzari; Kutxabanken zatia batuz gero, erabaki garrantzitsuak blokeatzeko gutxienez akzioen %25 izango lituzketelako horrela.

Jaurlaritza Finkatuz funtsa sortu nahian dabil akzioak erosteko. Aurrekontu proiektuak 75 milioi euro aurreikusi ditu funts horretarako. Jaurlaritzak CAFen %1,24 eta Kaikuren %7,3 erosi ditu azken urteetan.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Koordinazio batzordearen bileraren hasiera, atzo, Iruñean, Nafarroako Jauregian. ©IÑIGO URIZ / FOKU

Madrilek eta Iruñeak 431 milioiko ekarpen garbia itundu dute 2020rako

Joxerra Senar

Metodologia zehaztuta, Nafarroak lehen bi urteetan gehiago pagatu zuenez, estatuak 138 milioi euro itzuliko dizkio. Aurtengo ekarpenari dagokionez, doikuntzak eginda «aldekoa» izatea espero dute

Liberiako petroliontzi bat Gdanskeko portuan, artxiboko irudi batean. ©ADAM WARZAWA / EFE
Mondragon korporazioaren, Laboral Kutxaren eta Ikerlanen egoitzak, Arrasaten. ©MONDRAGON

Ulma eta Orona, Arrasatetik urrutiratzen

Aitor Biain

Mondragonetik atera, eta korporazioarekin harreman eredu berri bat izateko proposamena egin dute Ulmak eta Oronak. Ereduen talkak eragin du bide propioa abiatu nahi izatea. Abenduaren 16an erabakiko dute bazkideek.

Tubacexeko langileen protesta, 2021eko otsailaren 23an, Laudioko lantegiaren aurrean. ©LAB

Espetxe zigorrak eskatu dituzte Tubacexeko hiru grebalariren aurka

Berria

Iazko otsailaren 23an atxilotu zituen Ertzaintzak, enpresaren atarian. Isunak ere eskatzen dituzte haien aurka

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.