Buteflika presidentearen bi eskaintzek ez dituzte baretu Aljeriako protestak

Esan du presidentetzarako bozak irabaziz gero urtebete barru dimisioa aurkeztuko duela. Herritarrek «trikimailutzat» hartu dituzte eskaintzak
Buteflikaren aurkako protesta bat Argelen, Argeliako hiriburuan.
Buteflikaren aurkako protesta bat Argelen, Argeliako hiriburuan. MOHAMED MESSARA / EFE Tamaina handiagoan ikusi

Ane Ubegun Goikoetxea -

2019ko martxoak 5

Aljeriako herritarren azken egunetako protestak ez dira nahikoa izan: Abdelaziz Buteflika Aljeriako presidentearen ordezkariek igandean adierazi zuten apirilaren 18ko presidentetzarako hauteskundeetara aurkeztuko dela. Buteflikak 82 urte ditu, eta gaixo dago 2013az geroztik —buruko isuri baten ondorioz—. Datozen bozak irabaziko balitu, haren bosgarren legealdia izango litzateke, jarraian —hogei urte egingo lituzke boterean—. Aljeriako herritarrak presidentearen aurkako protestak egiten ari dira, otsailaren 22az geroztik: salatu dute sistema zaharkituta dagoela eta Buteflika ez dela gai izan herrialdearen egoera ekonomikoa hobetzeko.

Aljeriako gazteek hartu dituzte kaleak, batik bat, eta gertatzen ari diren protestak herrialdean azken urteetan izandako «indartsuenak» izaten ari dira. Hori dela eta, Buteflikak bere hautagaitza aurkeztearekin batera, bi baldintza ezarri ditu: haren ordezkariek azaldu dute hautatua izango balitz konstituzioa berritzeko erreferendum bat egingo lukeela herrialdean, eta, horretaz gain, urtebete barru hauteskundeak antolatuko lituzkeela, eta hark ez lukeela haren hautagaitza aurkeztuko; hau da, urtebete barru kargua utziko lukeela.

Haatik, herritarrek ez dituzte aintzat hartu proposamen horiek, eta protestak ez dira eten: manifestazioak egiten jarraitu dute, bai igandean eta baita atzo ere. Adierazi dute eskaintza horiek boterean jarraitu ahal izateko trikimailu bat baino ez direla, eta ez dutela nahi Buteflika Aljeriako presidentea izaterik.

Oposizioko alderdiek ere ez dute begi onez ikusi aurkeztutako hautagaitza: iritzi dute Buteflika ez dela gai herrialdeko liderra izaten jarraitzeko. Dena den, gazteek ez dute ohiko bidea hautatu protestak antolatzeko: alderdi politikoen parte hartzerik gabe eta inplikaziorik gabe antolatu dituzte. Orain arte, oposizioko alderdiek «kanpotik» bizi izan dituzte, beraz, protestak.

Herritar gehienak bat datoz: Buteflikak denbora «gehiegi» eman du presidente karguan, eta diote herrialdeak aldaketa baten beharra duela. Salatu dute ez dela gai izan aljeriarren arazoak konpontzeko, eta horien artean, gazteen arazoak, batik bat: kalean egindako mobilizazioetan nabarmendu dituzte pobrezia, migrazioa —Frantziara eta Espainiara— eta itxaropen falta. Gainera, gogor kritikatu dute presidenteak herrialdearen arazo ekonomikoen aurrean izan duen jarrera:petrolioaren jaitsierak ondorio larriak izan ditu herrialdearen ekonomian.

Zazpi urteko «isilunea»

Buteflika ez da jendaurrean agertu 2012ko maiatzean egin zuen agerraldiaz geroztik. 2013an gaixotu zen, eta 2014ko hauteskundeen kanpainan ere ez zuen hitzaldirik eman. Gainera, haren egungo osasun egoera ere ez da ona: Suitzan dago otsailaren 24az geroztik, «ohiko zaintzak» jaso baititu hango ospitale batean, Suitzako komunikabideek esan dutenaren arabera. Hori dela eta, Aljeriako gazte askok diote inoiz ez dutela presidentea hitz egiten ikusi, eta ez dakitela nor den ere.

Aljerian ez ezik, beste herrialde batzuetan ere egin dituzte presidentearen aurkako protestak: Parisen, esaterako, 6.000 lagun inguru bildu ziren atzo.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Muriel MacSwiney ekintzailea, New Yorken, senar Terenceren heriotza salatzeko protesta batean. ©BERRIA

Matxinada baten adar guztiak

Niall Cullen

Gaur ehun urte bete dira Terence MacSwiney irlandar errepublikanoa hil zela, 74 egunez gose greba egin eta gero. Berehala bilakatu zen nazioarteko erreferentzia antiinperialistentzat eta nazionalistentzat.

Frontex agentziako agente batzuk, Portugalgo kostan, artxiboko irudi batean. ©EFE

Frontex migratzaileen legez kanpoko itzuleren «konplize» dela salatu dute

Ander Perez Zala

EBren agentzia «hein bateraino» dago «inplikatuta» jardun horretan, ikerketa baten arabera

Lopez, iaz emandako elkarrizketa batean. ©M. G. / EFE

Leopoldo Lopez Venezuelatik atera da

Ander Perez Zala

Oposizioko buruzagia Espainiaren enbaxadan zegoen 2019an Maduro boteretik botatzen saiatu zirenetik; «bide klandestino bat» erabili du herrialdetik irteteko. Bere aitaren arabera, Espainiara joango da «laster».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna