Albistea entzun

ARKUPEAN

Pablo Motos eta hilekorako kopa

Julen Azcona -

2022ko abenduak 1

Egun hauetan sare sozialetan hainbeste biralizatzen ari diren bideoen artean, badago bat non Pablo Motosek, El Hormiguero programaren aurkezleak, nazkarekin kopa menstrual bat hartu eta «gizagalduen asmakuntza bat» dela esaten duen. Bi minutu luzeetan zehar, bere kolaboratzaileek (gizonak denak) hilekoari buruz hainbat iseka eta trufa egiten dituzte. 2022an, non, pixkanaka, kopa geroz eta barneratuagoa dugun gizartean eta hilekoari buruz geroz eta gehiago hitz egiten ari garen publikoki, bitxikeria martzianoa da gizon hauen irri algarak entzutea, Espainian dagoen telebista saiorik ikusienean.

Ez da bideo bakarra. Twitterren ikus daitezke azken hamabost urteotan programan bizitako hainbat eta hainbat momentu misogino eta sexista. Ana de Armas eta Kristen Stewart aktore gazteei haien gorputz eta janzkerari buruzko galderak egiten zitzaizkien, behin eta berriro, egoera deseroso eta tirabiratsuak sortuz. Bereziki harridura eta haserrea sortu dute adin txikiko emakumeei zuzendutako komentario sexualizatuek: Selena Gomez eta Miley Cyrusi «sexy» deitzen die aurpegian, zuzenean egiten den saioan. 17 urte zituzten garai hartan. Pablo Motosek, 40 baino gehiago.

Polemika Espainiako Berdintasun Ministerioak bultzatu duen kanpainarengatik sortu da, A-25 Emakumeen Aurkako Indarkeria Desagerrarazteko Nazioarteko Eguna dela-eta bultzatutakoagatik. Bertan, Pablo Motosek Elsa Pataky aktoreari egindako elkarrizketa bat imitatzen da. Nahiz eta aurkezlearen izena inon ez esan, gizonak aipatutzat jo du bere burua eta, bere programan, hamar minutu baino gehiago egon zen aurreko astean bere zintzotasuna defendatzen. Erabili zuen argumentuetako bat gizonekin jarrera bera duela izan zen. Defentsa horren aurrean, tuiteroak azkar-azkar hasi dira hamaika bideo zahar azaleratzen.

Pablo Motosen joera desberdina da elkarrizketatzen dituen gizon eta emakumeekin. Ez daukat dudarik. Gizonekin duen tonua lagunen artekoa da, nahiz eta txiste sexualak egin. Berdinen artean dago Pablo beste gizon batekin dagoenean. Emakume baten aurrean, ordea, sexu-bikotekide potentzial batekin ari da. Honetan, Pablo ez dago bakarrik. 2000ko hamarkadan hori zen joera orokorra telebistan, zineman eta, baita ere, noski, eskolan. Pablo bezalako hainbat eta hainbat mutil ezagutu ditut nire haurtzaroan. Emakumeak beste planeta batetik etorritako estralurtarrak direla sinesten zutenak, soilik arropari eta makillajeari eta mutilei buruz hitz egiten dutela, tentelak direla, superfizialak, ederrak, sexualak, gaiztoak, birjinak, emagalduak, erabili eta botatzekoak. Klasean ohikoak ziren feminitatearen aurkako txisteak. Neskek maite zituzten filmak, abestiak, jostailuak, koloreak... txarrak ziren, barregarriak. Noski, mutilok haietatik urrun mantendu behar genuen. Eta, dudarik balego, gauero bazegoen, familia osoak ikusten zuen programan, gorroto sexista horren legitimazioa, jostailuzko inurri batzuen forma inozoaren atzean ezkutatzen zena. Nola biziraun dute egungo emakumeek, eta LGTBI+ komunitateak, orduko giro horretatik?

Dudarik gabe, infantzia horretatik dator Pablo. Horregatik, Ana de Armas edo Miley Cyrus bezalako talentuz betetako artista gazteak ezagutzen dituenean, ez daki zer esan, zer egin; bere aurrean ez daude pertsonak, neskatila tuntunak baizik. Ez du enpatiarik sentitzen, ez da ulertzen saiatzen. Hilekorako kopa, emakumeen erosotasuna bermatzeko asmakuntza, «gizagalduen» kontua da, bera bezalako gizon batentzat sortu ez den zerbait delako.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Arrosarioa
 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.