Ikus-entzunezkoen Legearen «kutsu ekonomizista» salatu dute

EH Bilduko eledun Mertxe Aizpuruak «belaunaldi berrientzako bereziki garrantzitsua» izango den lege gisa definitu zuen atzo Ikus-entzunezkoen Lege proiektua, ostegunean Espainiako Kongresuko osoko bilkurara iritsiko dena. Koalizio subiranistak, baina, ez zuen zehaztu zer bozkatuko duen, eta espero du Espainiako Gobernuak zuzenketen inguruan «hausnartzea». Izan ere, EH Bildu abstenitu egin zen aurreko astean, Gai Ekonomikoetarako eta Eraldaketa Digitalerako Batzordean. «Espiritu ekonomizista bat dago lege honetan, eta izan behar zuen balio sozial, komunikatibo eta kulturala desagertuta dago erabat», adierazi zuen.

Aizpuruaren esanetan,batzordetik ateratako lege proiektuak «akats larriak» ditu, «zenbait aurrerapen» eragingo dituen arren. Testua «gutxienekoen» akordio gisa kalifikatu zuen, eta Europako beste zenbait herrialdetan martxan diren legediekin alderatuta «oso kontserbadorea» dela esan: «Eduki demokratikoetan Europara homologatzeko aukera bat galdu da».