Gaur eta bihar bilduko da Hualde eledunekin, inbestidura aztertzeko

Orain Maria Txibitek du hautagaitza aurkezteko aukera handiena, baina PSNk ez du presarik
Atzo, mahaiaren eta eledunen legealdiko lehen bilera. Ezkerra eta Ahal Dugu-ko kiderik ez zen izan.
Atzo, mahaiaren eta eledunen legealdiko lehen bilera. Ezkerra eta Ahal Dugu-ko kiderik ez zen izan. JAGOBA MANTEROLA / FOKU

Joxerra Senar -

2019ko ekainak 26
PSNk ez du presarik. Atzerako kontaketa maiatzaren 26ko gauean hasi zen. Bi hilabete falta dira gobernua osatzeko epemuga amaitzeko. Gaur eta bihar, Unai Hualde talde eta alderdietako eledunekin bilduko da inbestiduraren aukerak aztertzeko. Gaur, 10:30etik hasita eta ordu erdiko tartearekin, Ezkerrarekin, Ahal Dugu-rekin eta EH Bildurekin batzartuko da. Bihar, berriz, 10:00etan hasita, Geroa Bai, PSN eta Navarra Sumarekin bilduko da. Orain, foku guztiak Maria Txibite sozialistarengana zuzenduta daude. Akordio programatikoa adosteko bidean, lehen zirriborroa helarazi zien PSNk Geroa Bai, Ezkerra eta Ahal Dugu-ri, eta bihar arratsaldean, 17:30ean, hurrengo bilera egingo dute.

Motel baina tinko, aurrera jotzeko borondatea agertu zuen atzo Ramon Alzorriz PSNko Antolakuntza idazkariak. Beste behin berretsi zuen 23 parlamentariz osatutako gehiengo bat osatzea dutela helburu: «Ez dago ezer hitzartuta. Dena dago mahai gainean». Bere hitzetan, akordioa lotu arte, ezingo da inbestiduraz hitz egin: «Auzia ez da noiz nahi dugun izatea, baizik eta noiz ahal dugun».

Adolfo Araiz EH Bilduko ordezkariaren hitzetan, 23ko gehiengo hori «politika fikzioa» besterik ez da. PSNk beste hiru alderdiekin akordioa erdietsi zein ez, ezinbestean, EH Bilduren abstentzioa behar luke Txibiteren inbestidurara begira, eta Araizek ohartarazi zuen eurekin hitz egin beharko dutela. «Bitartekaritza zuzena izan nahi dugu», esan zuen. «Batez ere bazterketa politikoa gainditu behar da, eta normalizatu egin behar da orain arte normala izan dena», azaldu zuen, gogoan hartuz aurreko legealdian ohiko erlazioa izan zutela PSNrekin.

Navarra Sumako Javier Esparzak ere azpimarratu zuen PSNk ez dituela 26 boto, 11 baizik. «Geroa Bai, Ezkerra eta Ahal Dugu-rekin, 23 parlamentariren babesa dute, baina 23k ez dute gehiengorik ematen. Bildu behar dutela jabetu behar da PSN». Espainian, Pedro Sanchezen inbestidura babesteko eskaintza berretsi zuen Esparzak, beti ere Nafarroan sozialistek orain arteko bidetik jarraitzen ez badute. Navarra Sumako hautagaia PSNren elkarrizketek zer emango zain dago, baina, edukiei begira, bi aldeetako batek bere printzipioak alboratu beharko dituela uste du: «Edo PSNk lau urtez esan duenari uko egiten dio edo laukoak urteotan egin duenari uko egiten dio».

Atzo legealdiko lehen bilera egin zuen mahai eta eledunen batzordeak. Ahal Dugu-k eskatu du talde mistotik atera eta parlamentari elkarte bat osatzea —talde baten eskubide eta baliabide berak lituzke—. CDNk zein Ezker Batuak 2007an edo PPk eta Ezkerrak 2015ean lortu zuten, baina aurrekariok izanagatik, EH Bilduk eta Navarra Sumak ondorio juridikoak eta ekonomikoak aztertzeko eskatu dute.

Mahaiaren zabaltzeaz

Erabakitzeko dagoen beste auzi nagusia mahaiaren zabaltzea da. PSNk beste bi kide gehiago (Ahal Dugu eta PSNkoa) izatea proposatu du, baina ez da erabakirik hartu, txostenek zer esango ikusi arte. Hainbat zalantza argitu behar dira. Lehenik eta behin, jakin behar da ea araudia aldatu egin beharko litzatekeen —Espainian, Andaluziako Parlamentuan hala egin zuten 2016an—. Bigarrenik, ez dago argi, araudia aldatu bitartean, parlamentuko presidenteak behin-behineko ebazpen bidez har dezakeen erabakia. Azkenik, ikusteko dago bi kide izendatzearekin aski den. Navarra Sumak uste du berriz osatu beharko litzatekeela mahaia.

Taldeetako eledunak izendatu dira. Navarra Sumaren kasuan, bozeramailea Javier Esparza izango da eta bi albokoak, Carlos Perez Nievas (Ciudadanos) eta Jose Suarez (PP).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna