Euskara, «bermeekin»

Nafarroako Gobernuko kontseilari Ana Ollo euskararekiko dauden borondateak errespetatzearen eta elkarbizitzaren alde azaldu da
Euskaltzainak eta Argia ikastolako arduradunak, atzo.
Euskaltzainak eta Argia ikastolako arduradunak, atzo. BERRIA

Iñigo Satrustegi -

2019ko irailak 21
Nafarroako Gizarte Harremanetako kontseilari Ana Ollok atzo egin zuen lehen agerraldia gobernua osatu zenetik. Hurrengo lau urteetan zuzenduko duen departamentuaren ildo nagusiak aurkeztu zituen, eta «Nafarroako errealitate historiko, sozial eta kulturala, berezkoak dituen bi hizkuntzak barne», defendatzearen alde azaldu zen. Euskarak eta gaztelerak gizartea kohesionatzeko ahalmena dutela esan zuen, euskara «baztertzailea eta konfrontazio tresna» dela dioten mitoak gezurtatzeko. «Euskarak ez du bereizten; are gehiago, gizarte gisa gure balioa handitzen du». Euskararen Legea izango du ardatz gobernuak, eta lege hori aldatzera egiten bada errealitate soziolinguistiko desberdinak kontuan hartu beharko direla esan du, betiere «askatasuna eta euskararekiko borondatea bermatu» daitezkeela ziurtatzen denean.

Gainera, gobernua babesten duen laukoak adostutakoa gogoan, jakinarazi du administrazioan euskararen erabilera normalizatzeko dekretua aztertu, eta, beharko balitz, «egokitu» egingo dutela. Horretarako lantalde bat osatu du gobernuak, Funtzio Publikoaren Zuzendaritza Nagusiko eta Euskarabideako kideekin.

Kontseilariak adierazi du garrantzitsua dela elkarbizitzaren alde lan egitea, eta «abilezia, elkarrizketa eta enpatia» beharrezkoak direla.

Euskaltzaindia Tuteran

Bizikidetzaz mintzatu dira Euskaltzaindiko ordezkariak ere Tuterako Argia ikastolan, Nafarroako hegoaldean. Euskarak herrialdeko «kultura desberdinen arteko elkarbizitza harmonikoan» laguntzen duela adierazi dute, eta «ondarezko hizkuntza» gisara aldarrikatu dute. Urriaren 20an ospatzekoa den Nafarroa Oinez jaiaren harira gonbidatu zituzten atzo akademiako ordezkariak Tuterako ikastolara.

Euskaltzaindiko zuzendari Andres Urrutiak goraipatu egin zuen ikastolek euskararen presentzia bermatzeko eta ikustarazteko egiten duten ahalegina, bisitan eginiko adierazpenetan. Argia ikastolak bakerako eta multikulturaltasunerako egindako lana ere aitortu nahi izan zuen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna