LARREPETIT

Momentutxoak

Maddi Ane Txoperena Iribarren -

2019ko uztailak 17
Oporrak izan zein ez, udako egun luze eta eguzkitsuek badute zerbait, nola erran... zerbait berezia. Pasatu berri diren Iruñeko sanferminetan hitz berezia eta guzi dute erran nahi dudana adierazteko: momentiko-a. Eta ez naiz iruindarra, baina iruditzen zait hitza ongi ulertu badut horrelakoz betea dagoela uda, hain zuzen: unean bertan baino bizi ezin diren momentuz; azaltzen zailak diren, eta azalduta ere grazia galtzen duten horiez, bizi eta kito egin behar direnez.

Ez da kasualitatea izanen sanferminetan asmatu izana hitza, herriko bestak halakoz beteak baitaude. Parranda ez baita alkohol edan huts bat, ezpada egun zein gaueko gertakari ederrez beteriko zerbait. Kasualitatez lagunartean egiten den bazkari bat, kuadrillakoen arteko bermuta, danborra jotzean elkarri egindako irribarre konplizeak, txaranga bat agertzea gutxien espero duzunean, kontzertu bat entzutean sentitzen duzun zirrara, parekoak zer pentsatuko duen burutik pasatu ere egin gabe dantzan hastea, bestondoz egin eta erraten diren txorakeriak, aspaldiko lagunekin ordu txikitan mundua konpontzea, gauak eraman zaitzala aurreikusiko ez zenukeen lekuetara. Edo bertze mila gauza.

Eta, bestatik kanpo ere, zenbat halako momentu, udan baino bizi ez ditugunak. Hondartzara joan eta uretan gora begira begiak itxita flotatuz arnasa hartzea, hondarretan etzatea norbere arnasaren kontziente; mendiko ibilaldietako izerdia eta ondorengo garagardo limoiduna; afalondo izartsuetan izarrei begira erretako zigarroa, Tour-eko helikopteroaren doinuaz egindako siestak, edota liburu bat irakurtzea eguzki-itzalpetan, azken orriraino iristeko irrikaz.

Ederrak dira momentuok guziak, azaltzen zailak, eta azalduta ere grazia galtzen dutenak, edo ez lortzen behintzat daukatena bezainbat, bizi eta kito egin behar baitira. Aukera duenak goza ditzala, ohartu orduko iraila ate joka dago eta.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna