Albistea entzun

LARREPETIT

Super-produktuak

Samara Velte -

2022ko apirilak 22

Gurasotasunak hainbat master aldi berean eta errekor denboran egitera behartzen zaitu, besteak beste, lehen sorospenetakoa, haur musika eta literaturakoa, eta dietetikakoa. Haurrak sei hilabete betetzerako eginak dituzu Baby Led Weaning eta beste pare bat elikadura-sistemari buruzko ikastaroak, eta akabo zure ordura arteko lasaitasuna. Sekula ez zitzaizun galleta bat hain arriskutsua iruditu; inoiz ez zenituen supermerkatuan hainbeste produktu Yuka aplikaziotik pasatu eta alboratu; eta, noski, inoiz ez zenuen hainbeste diru gastatu natur dendako produktu ekologikoetan.

Izan ere, gauza bat da zuk gaueko bederatzietatik aurrerako zure gurasotasun-deskantsuan Tobleroneak irenstea haiei esker biziraun beharko bazenu bezala, baina haurrari? Haurrari onena eta osasuntsuena baino ez. Eta obsesio horretan laguntzeko, hortxe dituzu sare sozialek promozionatzen dizkizuten zerrendak: «Zure umearen garuna indartzeko zortzi jaki». Kontxo, pentsatzen duzu, irakurri beharko da, ez dadila gerta gure umea bere gradu unibertsitariotik kanpo geratzea urte eta erdirekin ez zuelako aski babarrunik jan.

Klikatzen duzu, eta, hara: zerrendako janari normalena arrautzak dira. Gainerako super-elikagaiak (sic) hegazkinez ailegatzen dira Euskal Herrira: ahuakatea, txia haziak, anakardoak, izokina, eta oloa, noski, porridge forman. Eta zuri, oraindik zeure buruari barre egiten ikasi ez duzun guraso berri zalantzati horri, eztabaida morala pizten zaizu, guraso on batek super-elikagaiak edo ekologismoa lehenetsi beharko ote lituzkeen deliberatuz, karbohidratoen eta proteinen arteko orekari gaur behar bezala eutsi ote diozun kalkulatzen, gaueko Tobleronea urrunetik deika sumatzen duzun bitartean, eta zeure buruari galdetzen diozun artean ea ez ote zaren zu zeu bihurtzen ari merkatu handiago baten produktu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...