Albistea entzun

LARREPETIT

Marrazki bizidunek dute errua

Jaume Gelabert -

2021eko azaroak 25

Beharrik Nafarroan Sergio Sayas dugun, argindarraren prezioa izugarri garestitu den garaiotan argia doan ekartzen digulako etengabe. Bide zuzena erakusten duen UPNko itsasargiak neure buruari aspaldi egiten nion galderari erantzun dio aste honetan. Orain badakit zergatik naizen horren pertsona ankerra, bihozgabea, gizartean oztopo egiteko besterik balio ez duena: Dragoi Bola marrazki bizidunek dute errua.

Egiari zor, gaztetan ez nuen dragoi bolarik ikusi, Bola de Drac baitzen Mallorcan pantaila aurrean biltzen gintuen TV3-eko telesaila; berdin du, ongi ulertu baldin badut Sayasen irakaspena, arbuiagarria, eta, batez ere, arriskutsua da gaztelaniazkoa ez den marrazki bizidun oro. Kontuz, alemanezkoak edo ingelesezkoak balira, haur eta gazte ikusleei zuzendutako saio horiek ezinbestekoak eta onuragarriak lirateke. Bai horixe, argia da Iratxo Dortoka foralaren mezua: estatuko edozein hizkuntza gutxitutan ekoiztutako, bikoiztutako edo azpititulatutako produktuak gaitzesgarriak dira. ETB3k hondamendia ekarriko luke Google Translateren herrira. Horregatik, Sergio Sayasek esan duen bezala, «nafarrok ez dugu ETB ikusi nahi», mallorcarrok TV3 ikusi nahi ez genuen bezala —Kataluniako telebistaren saioak irensten genituen bitartean—. Maisu jakintsuaren hitzetatik ateratako beste ondorio bat: kaikuak ginen Mallorcan eta tontolapikoak gara Nafarroan, urrutiko aginteko botoi bat sakatuta erraz konpontzen baita arazoa.

Ezagutu dut gaiztakeriaren sorburua, baina baditut Sayas senseiarendako galdera gehiago. Jakin nahi nuke haurtzaroan zer marrazki bizidun ikusten zituzten paradisu fiskaletan dirua gordetzen duten kargu publikoek, sanferminetako eraso sexistak ezkutatzen dituzten zinegotziek, edo, esaterako, genozida baten omenezko mezetara joaten den politikariak. Oroz gain, dragoi bola bat emanen nuke Sayasen gustuko marrazkiak ezagutzearen truke.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.