LARREPETIT

Egungo gerrak

Garazi Arrula Ruiz -

2018ko irailak 21
Iragan asteburuan, Espainiako Estatuko aldizkari irakurrienak azalera zekarren goiburu hau: «Nola atera etekina estresari»; oihuka ari den gizon baten aurpegi zainduaz lagunduta zetorren, zerura daraman eskailera batek aurpegia erdibitzen diola. Barruan, ikerketa zientifikoz eta jende adituz ongi bustiriko erreportaje bat. Azalak ez bezala, erreportajeko azpitituluak dio estresak 2,5 aldiz biderkatzen duela heriotza goiztiarrerako arriskua. Segidan, ordea, ez kezkatzeko: lanera itzultzeak sor dezakeen antsietateak, ongi kudeatuz gero, arrakastan gora eraman zaitzake. Aurreko baieztapenari larritasuna arintzeaz gainera, hilgarri ez ezik arras mingarri den horri konnotazio positiboak eransten dizkio.

Abiapuntua azaltzeko beharrik ez dute ikusten; hots, zergatik sorrarazten duen lanak antsietatea. Errora jo ordez, estresa normalizatu eta despolitizatzen dute, egiturazko eragilerik ez balego bezala, eta borondatera mugatzen: «Estresaren kudeaketa, hein handi batean, jarrera kontu bat da». Beraz, nahiz eta masiboki eragin, norberaren esku dago (eta norberaren ardura da) estresa behar bezala kudeatzea, ez soilik goiz ez hiltzeko, etekina ateratzeko ere bai. Daria Bogdanska Esclavos del trabajo / Dans le noir (Astiberri / Rackham) komikiaren egileak dioen bezala, sinetsarazi digute norbera dela bere arrakastaren edo porrotaren erantzule bakarra.

Harreman sozialak, gaitasunak eta beste zernahi immateriala merkantilizatzen den honetan, nahitaezkoa da irudi osoari erreparatzea eta mekanismoaren loturak eta errepresentazioak identifikatzea. Horretan lagungarri da La sociedad del rendimiento (Katakrak) saiakera polifonikoa, zenbaitetan baita aztoragarri ere, erakusten baitu nola blaitzen gaituzten egunerokoan neoliberalismoaren adierazpideek. Elkarri begiratu eta praktika kolektiboen bidez erantzun ezean, autoestimu emozionala zanpatzen duten askotariko presioak geure buruari jartzen segituko dugu, eta hori ere gure (norbanakoaren) erantzukizuna izanen da.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna