LARREPETIT

Hemeretzi

Maddi Ane Txoperena Iribarren -

2018ko azaroak 28

Azken urteotan banuen susmo bat: Lapurdin gertatzen ziren erailketa matxistak proportzioz kanpokoak zirela; ez zela normala gertatzen zena. Ez nuen sekula kalkulurik egina, ordea. Eta BERRIAk argitaratu berri duen zaurien mapak berretsi egin dit, baita Mikel Peruarena Ansak hari buruz egindako analisiak ere: 2003tik gaur arte 98 emakume eta 11 ume hil ditu indarkeria matxistak Euskal Herrian, eta horietatik hemeretzi emazte eta hiru haur ziren Lapurdikoak; alegia, hilketen %20. Datua ez da biztanleriarekiko proportzionala, Euskal Herriko biztanleen %8 baino ez baita bizi probintzia horretan. Hiriburuetako rankingean ere lehenengo bederatzien artean daude Baiona bost hilketarekin, Angelu eta Hendaia, hirunarekin.

Zaila da ikerketa sakonik egin gabe baloraziotan sartzea, baina nago ez direla kasualitate hutsekoak datuen arteko arrakalak. Gogora ekarri dizkit, erraterako, 1995etik 2014ra Baionako auzapez izandako Jean Greneten hitzak, zeinak Baionako bestetan izandako bortxaketen harira azpimarratu baitzuen tanga jantzita eta kamisetarik gabe ibilita «bortxatua izateko aukerak» zeudela. Gogoan, halaber, gaur egungo udal gobernuarenak, zeinak besten ondoko balorazio batean azpimarratu baitzuen bestak oso ongi pasatu zirela «bortxaketak salbu». Gogoan Samuel Vuelta Simon prokuradorearen hitzak zeinak bortxaketa edo hilketez galdetzerakoan lehenengoak estali eta bigarrenak «bikote barruko indarkeria» gisa hartzen baitzituen eta baititu, seguruenik. Ez zait kasualitatea iruditzen, ez eta Ipar Euskal Herrian ez egotea Emakunde gisako egiturarik, ez berdintasun teknikaririk, ezta indarkeria matxistaren ezein behatokirik ere; alegia, politika feministarik ez batere.

Frogarik gabeko hipotesi merkeak dira, baina indarkeria matxista estrukturala bada, nago ez ote duen horietako bakoitzak izanen erantzukizunaren zati bat.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna