Albistea entzun

LARREPETIT

Erresilientzia

Jaume Gelabert -

2019ko ekainak 13

Nafarroako Tronu Demaren amaieraren zain gaude jarraitzaile asko. Ados, gurean ez dago ahotik sua botatzen duen herensuge hegaldunik —Ana Beltranek Madrilera egin du hegan— eta egia da bertako zonbiek ez dutela —oraingoz— negu etengabea ekartzeko asmorik, nahikoa baitute kontent egoteko —lerrook idazteko unean— «pertsona normalak» sortuko dituen Erdi Aroko eskola-eredua ezartzea. Baina trama nafarrak ere baditu interesa pizteko hainbat osagai: esaterako, heroi foral ezkertiarren jokabidea Game of Thrones-ekoena bezalakoa da, elkar jotze eta adiskidetze gurpil ero mugagabea; eta, ororen gainetik, denok gaude garailearen izena ezagutzeko irrikan.

Oraindik ez dakigu nor izanen ote den irabazlea; zenbaki hotzek adierazten dute, ordea, nor diren galtzaileak. Kalkuluei men eginda, galtzaile litzateke, adibidez, eskolan kultura berdinzalea eta sexu indarkeriaren aurkako kontzientzia zabaldu nahi duena; sistema publikoan sinisten duen lagunak ikusiko luke —aritmetikaren arabera— turbokapitalismoaren morroi baten ipurdiak berotuko duela tronua; eta euskaraz normaltasunez bizi nahi duenak ohi baino oztopo gehiagori egin beharko lioke aurre bere helburua betetzeko.

Hala ere, nahiz eta tarte asaldagarriak heldu diren, arnasguneak ere izanen ditugu. Iruñeko Karrikiri elkarteak, adibidez, garai ilunagoetan ere erakutsi digu euskaraz bizitzea eta euskal kulturaz gozatzea posible dela. Karrikiriko militanteek-eta, besteak beste, Euskalerria Irratikoek, Zabaldikoek, Sustrai Erakuntzakoek, Katakrakekoek, Sortzen-ekoek eta Iruñeko auzoetako zein Nafarroako herrietako hainbat eta hainbat kolektibotako kideek—zerrenda luzea baita— badakite posible dela egoera latzari aurre egitea, dagoeneko lehengo estualdiei aurpegi emana dietelako; ahalegin handiz, bai, baina egina. Zenbakiak zenbaki eta azken ataleko garailea zeinahi den ere, Nafarroako biztanleriaren zati handi bat ez dago galtzaile izateko prest.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley
Ondoeza

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.