LARREPETIT

Zorion handiegia

Jaume Gelabert -

2018ko irailak 20
Artikulu tristeak idazten ditudala ohartarazi dit lankide batek, «Hi, konta ezak zerbait alai hire zera horretan, albiste onak ere izan baitira, kontxo!». Ez zaio arrazoirik falta, nire zera horiek berrikusita egiaztatu baitut orain arte idatzitakoa iluna dela. Aginduari men eginda, berri alaiak bilatzeari ekin diot. Lan nekeza eta ikerketa sakonaren ondorioz, etxera bizipoza ekarriko diguten bi berri atsegin bildu ditut. Biak, gainera, hezkuntza arlokoak dira, lankidearen zein, noski, nire lan esparrukoak.

Lehenengoa, barka, zutabe honetako muga geografikoetatik kanpo aurkitu dut, Madrilen. Bekatua arintzeko alegatuko dut protagonista, Isabel Celaá Espainiako Hezkuntza ministroa, euskalduna dela. Hezkuntza kontseilari ohiaren esanetan, Espainiako monarkia parlamentarioak Saudi Arabiako monarkia monetarioari saldu dizkion 400 bonbek ez dute yemendarren hilketarik eraginen, zehaztasun handiko armak direlako. Pozteko arrazoi anitz bildu dira Celaáren esaldi bakarrean. Algarak eta txaloak nonahi sortuko dira Saudi Arabiak ez duelako hemendik aurrera yemendarrik hilko, eta bozkariozko negarrak Espainian zein Euskal Herrian ekoitzitako arma zehatzetan zehatzenek triskantzarik eginen ez dutelako. Are hunkigarriago, nork ez ote luke negarrik eginen hurrengo belaunaldien zoru etikoa Isabel Celaáren gidaritzapean finkatuko dela jakinda?

Bigarrena etxekoa da. Uxue Barkos Nafarroako presidenteak jakinarazi digu ikasturte berria «eraldatze digitalarena» izanen dela. Zorionekoak gu! Aurrerantzean departamentuko historiaurreko ordenagailuek ez digute segundorik galaraziko eta ez gaituzte gure onetik aterako, martxan ez dauden fotokopiagailuek fotokopiatuko dute eta lehenengo iraultza industrialeko inprimagailuek inprimatuko.

Agindua betea, idazki bukatu berriak zorion handiegia sortuko duelakoan, heldu den astean betiko zera goibeletara itzultzea erabaki dut.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna