Albistea entzun

LARREPETIT

Gautxoa izan nahi dut

Nora Arbelbide Lete -

2020ko abenduak 18

Argentinako nazioa antolatzen ari zirelarik 1880an, gautxoen alfabetatzeko saiakera bat egin zuten. Zintzoki nahi izan zituen alfabetatu, boterearen aurka armatuagoak izateko. Harriturik, ordea, gautxoek ukatu egin zieten proposamena. Miguel Benasayag filosofoak gogoratu izan zuen gertakaria 2012ko TEDxConcorden, Gatazkari gorazarre mintzaldian: «Zapalduek intuizioz sentitzen zuten alfabetatzeak beren zapaltzaileengandik zuten menpekotasuna handituko ziela. Maisuaren jakintza jasoz, boterearen estruktura irensten duzu ohartu gabean». Gogoeta honen oihartzuna burmuinetik ezin kenduz nabil. Noiz eta konkurtso bat prestatzen ari naizela funtzionario bihurtzeko edo. Preseski, lerro hauek nire azkenak izanen dira bulta batez. Hemendik aitzina Samara Velte berriz irakurtzeaz pozten ahalko gara!

Ni linboetan galduko naiz bitartean. Konkurtsoaren izenburua bera... Ondarearen eta liburutegien lurraldeko kontserbadore laguntzailea, bigarren mailako arduraduna (frantses hutsean, bistan dena). Poema bat.

Interesgarria da ikasgaia, baina helburua argi utzi digu formatzaileak: koadroan sartzea. Koadroan sartu. Koadroan sartu. Behin eta berriz errepikatzen digu.

Ez da irabazia. Intuizioak gautxoen mundura eraman nahi nau... Baina aldi berean, burmuinaren beste txokoak Martintxo entzutea gomendatzen dit. Martintxok desafioa bota zien Basajaunei. Hauek beren eremuan ogi zuri ederraren gariak zituzten. Martintxoren herrian, berriz, arto zaharra baizik ez zuten.

Desafioa gari meta gainetik jauzi egitea zen. Nork urrunago. Basaujaunek salto egin zuten eta lortu. Martintxo txikia zen, ordea. Saiatu zen, bere bota handiekin, baina gari metaren erdi-erdira erori. Erditik jautsi eta joan zen, lotsati baina korrika bizian. Basaujaunak jukutriaz ohartu orduko urrun zen Martintxo. Ezin izan zuten harrapatu. Martintxok, herrira iristean, botak kendu eta barnean sartu gariak isuri zituen. Bazuten ogi zuria ereitekoa, orain.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.