Albistea entzun

Lau egun sei sokaren artean

Guitaralde jaialdia zazpigarrenez egingo da aurten, Hendaian. Igandea izango da egun handia:Jean Marie Ekai eta Carlos Benavent, Eñaut Elorrieta eta Sanseverino izango dira. Denetariko gitarra doinuak izango dira gaurtik igandera bitartean
18 urte izan arren, talentu handiko jazz gitarrajolea da Tom Ibarra.
18 urte izan arren, talentu handiko jazz gitarrajolea da Tom Ibarra. GUITARALDE Tamaina handiagoan ikusi

Andoni Imaz -

2018ko uztailak 5

Musika tresna eklektikoa da gitarra; nahi adina estilotako musika egin daiteke harekin. Ematen dituen aukera guztiak esploratzeko abagunea da Guitaralde jaialdia; Hendaian egingo da (Lapurdi), gaur hasi eta igandean buka. Gitarra izango da protagonista nagusia, eta talentu handiko hainbat musikari bildu dituzte kartelean.

Jaialdiaren sortzailea eta zuzendari artistikoa da Jean Marie Ekai gitarra jotzailea. Itoiz taldearekin aritu zen urte batzuez; musikari esker batetik bestera ibiltzeko zortea izan duela dio, baina erroak Euskal Herrian sentitu ditu beti. Horrela, ibilbide luzean egindako hango eta hemengo lagun musikariei eta harreman sareari esker sortu zuen jaialdia.

Gaur, bihar eta igandean, ordainpeko kontzertu bana egingo da, baina beste emanaldi guztiak doakoak dira. Ekaik dio garrantzitsua dela doako eskaintza mantentzea, baina talde handien emanaldiak gehiago zaintzeko balio du sarrera jartzeak. Sarrerak aurrez erreserbatu daitezke jaialdiaren webgunean.

Antoine Boyer & Samuelito gitarra bikote gazteak irekiko du jaialdia ostegun iluntzean, Abadia jauregian, flamenkoa gypsy jazz doinuekin nahastuz. Lehenak 23 urte ditu, eta besteak, 25; bakoitzak hamaika sari eskuratu ditu dagoeneko: besteak beste, Gitarra Klasikoko lehen saria Montignyn, 2015ean; Gitarra Klasikoko Errebelazioa, 2016an; eta Gitarra Flamenkoko eta Gitarra Klasikoko lehen saria Albin, 2013an.

Biharko ekitaldi nagusia Carles Ponsen kontzertua izango da, Bixintxo elizan. Ibilbide oparoa du Lleidan (Herrialde Katalanak) jaiotako musikariak; bakarlari aritu da zenbait orkestratan, Frank Rodriguez-Freites, Jordi Colomer eta Juan Jose Oconen gisako zuzendarien agindupean, eta Hondarribia-Peñiscola Nazioarteko Gitarra Jaialdiko zuzendari artistikoa ere bada.

Doakoak izango dira larunbateko kontzertu guztiak, eta Kamil Rustam eta Tom Ibarra gitarra jotzaile birtuosoak ariko dira, bakoitza bere boskotearekin. Rustam Amsterdamen jaio zen; Frantzian hasi zuen bere bidea, eta Los Angelesen finkatu zen azkenean. Stevie Wonder, Anastacia, Bruce Willis eta Snoop Dogekin egin du lan, besteak beste. Ibarrak 18 urte eskasekin erakutsi du zer talentu duen jazzean gitarra jotzen, eta Sparkling izeneko diskoa kaleratu du aurten, bere ibilbideko bigarrena. 6 urterekin hasi zen gitarra belarriz jotzen, eta 11 urterekin ondu zituen lehen konposizioak.

Guitaralde jaialdiaren egitarau guztitik, Jean Mari Ekaik igandeko eguna nabarmendu du; hiru emanaldi izango dira Ondaraitz estadioan. Ekaik berak irekiko du saioa, Carles Benavent baxu jotzailearekin eta Nicolas Viccaro bateria jotzailearekin batera. Benavent jazzean eta flamenkoan gailendu da, eta ezaguna da Paco de Lucia eta Camaron de la Islarekin baxu jotzaile aritu zelako urte askoan.

Eñaut Elorrieta duo akustiko formatuan ariko da Jesus Prieto Pitti gitarra jotzailearekin. Ken Zazpi taldeko abeslariak errepertorio berezia eskainiko du, bere hurrengo bakarkako proiekturako sortu dituen abesti eta moldaketa berriekin, eta Ekaik aurreratu du sorpresa bat ere prestatu dutela: kolaborazio bat egingo du Elorrietarekin, eta Itoizen As noites da Radio Lisboa abestia berreskuratuko dute Musikaz blai diskotik (1983). Ekaik berak konposatu zuen abestia, duela 30 urte baino gehiago Itoiz taldearekin grabatu zituen bi diskoetako baterako. Espaloian diskoa grabatu ostean (1985) utzi zuen taldea.

Sanseverino musikari frantziarrak eta bere bandak emango duten kontzertuarekin bukatuko da jaialdiaren aurtengo edizioa. Django Reinhardten zale sutsua da; arrakasta handia ari da izaten Frantzian, eta Montreuil / Memphis azken diskoarekin Atlantikoaren ertz batetik bestera jauzi egiten duen soinu elektrikora ireki da musikaria.

Jean Marie Ekaik 2012an ekin zion Guitaralde jaialdiari, Ipar Euskal Herriko musika jaialdien eszenan alea jarri asmoz. Hendaian kultura arloan lan egiten zuen lagun batekin elkartu eta festibala sortzea erabaki zuten, baliabide gutxirekin. Pixkanaka haziz joan da sei urteotan, eta horren erakusgarri da aurten hirutik lau egunera luzatu dutela jaialdia. Gaur egun «ondo bideratuta» ikusten du Ekaik, «aurrera jarraitzeko moduan». Guitaralderen inguruko informazio guztia guitaralde.hendaye.com helbidean aurki daiteke.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

1 ©MARISOL RAMIREZ / @FOKU

Berriro ere topagunea da

Ainhoa Sarasola

Iazko etenaren ondotik, aurrez aurrekoa izatera itzuli da Durangoko Azoka, eta, edukiera mugarekin, jendez bete da berriro ere Landako Gunea. Txandaka joan dira sartzen bisitariak, pilaketarik gabe

 ©ARITZ LOIOLA / FOKU

«Nahikoa lan izan dugu atzerakadari eusten»

Iñigo Astiz

Loiola, festara etorri, eta kulturak harrapatu zuen bere lehen Durangoko Azokan, eta Del Campo sormenerantz bultzatu du pandemiak. Landakon ezagutu dute elkar.

Myriam Miranda, Igor Muniategi, Amaia Ozerin eta Maite Bidarte, atzo, Landako guneko areto nagusian. ©MARISOL RAMIREZ / FOKU

Bidea urratzeko lanabesak

Andoni Imaz

Sortzaileei euren jardunean laguntzeko zenbait tresna azaldu dituzte mahai inguru batean: egile eskubideei, kontratazioari eta zabalkundeari buruzko argibideak eman dituzte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Andoni Imaz

Informazio osagarria

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.