Erasotzaileen aurrekarien berri jasoko dute indarkeria matxistaren biktimek

Espainiako Barne Ministerioak bidea ireki du indarkeria matxista pairatzen duten andreei informazioa emateko haien erasotzaileen aurrekariez, baldin eta aurrez ere beste emakumezko batzuen kontrako erasoak egin badituzte. Horretarako protokolo bat ondu dute; bertan ezarri dituzten irizpideen arabera, ohartarazpen horiek soilik egingo dira baldin etaerasotzaileak «jarraikien» kategorian sartuak badituzte, eta soilik aurreko bost urteetan aurrekariren bat izan badute. Ministerioak eman dituen datuen arabera, erasotzaileen %9,3k dute egun soslai hori.

Alerta sistema baten bidez funtzionatuko du abisuak emateko prozedura horrek. Indarkeria matxistako kasu baten berri dutenean, biktimak salaketarik ez jarrita ere, martxan jarri ahal izango da. Automatikoki helduko dira ohartarazpenak, baina gero poliziek ebaluatuko dute egoera bakoitza, eta «kasuz kasu» emango dute abisu bakoitza.

Espainiako agintariek Viogen sistemaren bidez kontrolatzen dituzte egun indarkeria matxista egotzitako pertsonak. 655.571 erasotzaileren datuak dituzte gaur egun, baina gehienek biktima bakar bat eragin dute. Erasotzaile «jarraikien» kategorian sartutakoak, hots, eraso bat baino gehiago egin dituztenak, 61.000 inguru dira gaur egun, eta horien biktimei emango zaie erasotzaile horien aurrekarien abisua.

Abisu horiek ematen hasteaz gainera, beste neurri batzuk ezartzen ere hasi nahi du Barne Ministerioak, indarkeria matxistako kasuekin eta haien larritasunarekin arduratuta; urtea hasi denetik zortzi andre hil dituzte bikotekide edo bikotekide ohiek.

Jaurlaritzaren oharra

Eusko Jaurlaritzako Segurtasun Sailak ohar bat atera zuen atzo, esateko egun Ertzaintzaren «eskuduntza» dela indarkeria matxista pairatzen duten andreen babesa, eta «prozedura» berezkoak dituela horretarako,Espainiako Poliziak eta Guardia Zibilak erabiltzen dituztenen bestelakoak. Nolanahi ere, prozedurak hobetzeko ahalegin «betean» ari direla esan dute, eta Barne Ministerioak eman duen jarraibidea aztertzen ari direla; hain zuzen ere, jarraibide horretan oinarrituta protokoloak «hobetzeko» bideren bat aurkitzen badute aintzat hartuko dutela jakinarazi dute.

Aditzera eman dutenez, 5.203 andre ari dira gaur egun indarkeria matxistako kasuen ondorioz Barne Sailak koordinatutako babes motaren bat jasotzen. Arriskuaren arabera, lau kategoriatan bereiziak dituzte. Oinarrizkoa: 3.773 andre daude. Ertaina: 1.154. Handia: 205. Apartekoa: 71. Arrisku maila horien araberako babes neurriak jarriak dizkiete.