Araba: hezkuntzan izan du eragin handiena

Askotarikoa izan zen greba orokorraren eragina Araban, baina hezkuntzan e ta osasungintzan izan ziren lanuzterik handienak. Hezkuntza publikoan, langileen %70ek egin zuten bat grebarekin, Steilasen arabera, eta EHUko Arabako campusean fakultate gehienak itxi egin zituzten.

Industrian, ordea, gehienek normal eutsi zioten eguneroko jardunari, eta grebarekin bat egin zutenen kopurua apalagoa izan zen gainerako lurraldeekin alderatuz gero. Hala ere, izan ziren lanuzteak enpresa ertainetan eta handietan: Gasteizen, denda, taberna eta merkataritza gune gehienak ere irekita egon ziren egun guztian, eta soilik piketeen protesten eraginez eta eguerdiko manifestazioan itxi zituzten.

Goizeko lehen orduan hasi zituzten protestak enpresa handietan eta industriagune garrantzitsuenetan. Pikete informatiboak egin zituzten, eta sarrerak oztopatu. Mercedesen, esaterako, poliziak babestuta sartu ziren grebarekin bat egin ez zuten langileak. Aldiz, sindikatuen arabera lanuzteak nabarmenak izan ziren Inauxan, Amurrio Ferrocarrilen, Aguraingo Arcelor Mittalen, Laminaciones Arreguin, Legutioko Sidenorren eta Laudioko Envases Metalurgicosen, Aurian, SDAn, Guardian eta Fronerin. SEA patronalak, ordea, greba «hutsala» izan zela esan zuen, eta lanuzteak denera %6 izan zirela.

Goizak aurrera egin ahala, ordea, Gasteizko kaleetara igaro zen protesta. Hainbat zutabe abiatu zituzten hiriko hainbat gunetatik, eta dendak eta merkataritza guneak izan zituzten jomuga. Horietako batzuek El Corte Ingles eta Boulevard ixteko ahalegina egin zuten, eta tentsio handia izan ziren orduan. Istilurik handienak, ordea, zutabe feministan izan ziren: Ertzaintza oldartu egin zitzaien grebalariei, eta hainbat lagun zauritu zituen.

Antolatzaileen arabera, eguerdiko manifestazioan 25.000 lagun inguru bildu ziren, eta istilurik gabe egin zuten Bilbo plazatik Andre Maria Zuriaren plazara arteko bidea. Sindikatuek pozik hartu zuten grebaren erantzuna lurraldean: «Mugarri bat da greba, eta ez gara konformatuko makillaje hutsarekin: erroko aldaketak nahi ditugu», adierazi zuen Arantxa Vazquez LABeko ordezkariak.