Emakume bat larri dago bikotekide ohiak jipoitu eta hari su eman ostean
Bilbon, Deustu auzoko etxebizitza batean 63 urteko gizonezko bat atxilotu zuen atzo Ertzaintzak, bikotekide ohia jipoitzea eta erretzea leporatuta. Emakumea oso larri dago, Gurutzetako erietxeko erredura larrien unitatean, eta haren bizitza arriskuan dagoela zabaldu dute.
Eusko Jaurlaritzako Segurtasun Sailak adierazi duenez, dei bat jaso zuten atzo bazkalostean, eta ohartarazi zieten garrasiak entzun zirela Deustuko etxebizitza batean. Poliziak hara heldu zirenean, 58 urteko emakume bat topatu zuten, kolpez zauriturik eta erredurak zituela. Biktimak berak esan zien ertzainei bikotekide ohia izan zela erasotzailea, eta gizonak arropa erre ziola; bizilagun batek lagundu zion andreari sua itzaltzen. Zaratak entzutean, beste bizilagun batzuek ere jo zuten harengana, eta artatu egin zuten osasun langileak heldu arte.
Gurutzetako ospitalera eraman zuten emakumea, kolpeek eragindako zauriak eta erredura larriak zituela; oso larri dagoela zabaldu dute hainbat hedabidek.
«Arbuio irmoena»
Erasoaren tokian bertan atxilotu zuten gizona, eta polizia etxera eraman zuten. Efe berri agentziaren arabera, andrea hamabost urtez bizi izan da erasoa gertatu den etxean, Deustun, eta alaba bat dauka.
Espainiako Gobernuak EAEn daukan ordezkariak, Denis Itxasok, gogor gaitzetsi zuen erasoa atzo, eta gizarteari dei egin zion «eraso ikaragarri honen aurkako arbuiorik irmoena» adieraztera.
117 emakume eta 11 ume hil ditu indarkeria matxistak Euskal Herrian 2003tik. Azkena Rebeca Huaytaren hilketa izan zen: Bilboko San Frantzisko auzoan hil zuten, abenduaren 28an.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.