Esportazioen azken datuek baieztatu dute Europan badagoela suspertze bat

Uztailean %4,8 gehiago esportatu du Alemaniak, eta %9,4 gehiago Frantziak. Euroguneko BPGa %11,8 amildu zen bigarren hiruhilekoan
Autoak prest esportaziorako, Alemaniako Emden portuan.
Autoak prest esportaziorako, Alemaniako Emden portuan. DAVID HECKER / EFE Tamaina handiagoan ikusi

Irune Lasa -

2020ko irailak 9

Pandemia aurreko datuetatik behera daude Europako datu ekonomiko guztiak, oraindik ere. Baina, pixkanaka, suspertzearen zantzuak antzematen hasi dira. Hirugarren hilabetez jarraian, Alemaniako esportazioen kopuruak gora egin du uztailean (+%4,7), oro har Europatik kanpora eta bereziki Txinara egindako salmentei esker. Suspertzea aurreko bi hiletakoa baino txikiagoa izan arren, analisten ustez, esportazioen datuek erakusten dute Alemania hasia dela onurak igartzen merkataritza globalaren berpiztetik.

Frantziaren esportazio datuak ere onak izan dira uztailean, %9,6 handitu baitira. INSEEren arabera, herrialde horretako ekonomiak pandemia aurreko jardueraren %95 berreskuratu du abuztuan. Institutuak uste du hirugarren hiruhilekoan BPGa %17 haziko dela eta, ondorioz, 2020ko gainbehera espero baino txikiagoa izango dela: %9koa.

Zenbateraino ote da suspertzea errebote teknikoa soilik? Argitzeko dago oraindik. Hirugarren hiruhilekoan Alemaniako esportazioak ere —eta barne produktu gordina— are gehiago berreskuratuko direla uste dute aditu gehienek, baina horretarako aldagai inportantea izan daiteke euroaren beraren trukea. Euro garestia, hain zuzen, hizpide izango dute, ziur, biharko Europako Banku Zentralaren kontseiluaren bilkuran.

Nadia Calviño Espainiako Ekonomia ministroak, berriz, esan du maiatzean «inflexio puntua» izan duela herrialdeak, eta hirugarren hiruhilekorako %10etik gorako hazkundea espero du barne produktu gordinean.

Dena den, Europak ez du aurreko ekonomia berera itzuli nahi. Charles Michel Europako Batasuneko Kontseiluko presidenteak atzo hitzaldi batean adierazi zuenez, hainbat gairen ekoizpenean Batasunak independenteago izan nahi du Asia eta AEBen boteretik.

Prozesadoreetan, sendagaietan eta halako funtsezko produktuetan 27 herrialdeko blokeak independentzia estrategikoa izatea «gure proiektu komuna da mende honetarako», esan zuen Michelek. Argi gelditu da Europako Batasunak nolabaiteko erantzuna eman behar diela COVID-19ak agerian utzitako ekoizpen gabezia larriei.

%11,8ko erorialdia

Pandemiaren kalte ekonomikoen neurriaren eta urteko bigarren hiruhilekoan konfinamendu neurriekin ia geldituta egon zen Europaren isla da Eurostatek atzo emandako datua: euroaren herrialdeetan barne produktu gordina %11,8 erori zen apiriletik ekainera, eta enplegua %2,9 murriztu zen.

Baina, beharbada, koronabirusaren kolpearen neurria hobeto ikusten da alderaketa aurreko urtearekin eginda. Euroguneko barne produktu gordina %14,7 txikitu zen, eta enplegua %3,1 murriztu zen.

2020ko lehen hiruhilekotik bigarrenerako aldaketan, Espainiako BPGak nozitu du kalterik handiena batasunean, alde handiz (-%18,4). Zerrendan atzetik izan ditu Kroazia (-%14,9), Hungaria (%14,5), Grezia (-%14), Portugal (-%13,9) eta Frantzia (-%13,8).

Europa iparraldeko herrialdeek izan dute beherakadarik txikiena: Finlandia (-%4,5), Lituania (-5,5), Estonia (-%5,6) eta Irlanda (-%6,5).

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

 ©BERRIA

Bezeroa: enperadore berria

Imanol Magro Eizmendi

Bezeroek langileen jarduna ebaluatzeko sistemak hedatzen ari dira. Telefono bidezko zerbitzuetan jaio ziren, eta dagoeneko denda fisiko askotan daude. Haien menpe daudenei presio handia eragiten die; adituek diotenez, zerbitzua hobetzeko baino gehiago kontrol erremintak direlako.

Trenasako langileen protesta Beasainen, asteon. ©GORKA RUBIO / FOKU
 ©CLEMENS BILAN /EFE
Turismoaren datuak kaskarrak izan dira irailean Euskal Ekonomiaren Termometroaren arabera. ©JON URBE / FOKU

Ekonomiaren errebotea %15,2koa izan da hirugarren hiruhilekoan

Irune Lasa

BPGaren urte arteko jaitsiera -%7,7ra murriztu da Araba, Bizkai eta Gipuzkoan, jarduera ekonomikoak udan izandako erreboteari esker. Enplegua %6,5 urritu da 2019ko hirugarren hiruhilekotik

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna