Albistea entzun

Uvesco banaketa taldea erosi du PAI Partners inbertsio funtsak

Kapital gehiena bereganatu du, enpresaren hedatze prozesua «babestu eta indartzeko» asmoz
Tamaina handiagoan ikusi

Aitor Biain -

2021eko abenduak 23

Europako PAI Partners inbertsio funtsak Uvesco taldearen kapitalaren gehiengoa eskuratu du. BM eta Super Amara supermerkatu katearen akzio gehienak erosi ditu, eta, ondorioz, banaketa enpresaren erabakigunea Irundik (Gipuzkoa) Parisera lekualdatuko da. Ez dute jakinarazi zehazki zenbat akzio erosi dituen, ez eta enpresaren egungo jabeei zenbat ordaindu dieten ere. Baina ziurtatu dute ez dituztela egoitza eta bulegoak lekuz aldatuko, eta egungo akziodunek ere enpresaren partaidetzari eutsiko diotela, gutxiengoan bada ere.

1993. urtean sortu zen Uvesco, Irungo Unialco eta Kantabriako Ves batu zirenean. Azken urteetan gehien hedatu den katea da, Mercadonarekin batera. Orain, zabaltzeko eta hazteko fase batean dago taldea, eta, enpresak adierazi duenez, PAI Partnersek plan hori «babestu» eta «indartu» egingo du. Izan ere, pandemiak jokaleku berri bat ireki die supermerkatuei, eta hazteko modua eman die. Uvescoren kasuan, esaterako, ia bikoiztu egin du fakturazioa azken hamarkadan. Iaz bakarrik ia laurden bat handitu zituen salmentak: 954 milioi euroko fakturazioa lortu zuen, 2019an baino %23 handiagoa.

Gaur egun 277 denda ditu guztira, nola Euskal Herrian hala Espainian. Baina saltoki eta frankizia berriak zabaltzeko aukera aztertuko du enpresak orain, inbertsio funtsaren laguntzarekin. Gainera, ez du baztertzen txikizkako elikaduraren «merkatu zatikatuan» sor daitezkeen bestelako aukerak ere baliatzea; hau da, beste enpresa batzuekin elkartzea edota horiek erostea.

Izan ere, bada denbora Uvesco taldea Hego Euskal Herritik Espainia inguruko lurraldeetara hedatzen hasi zela, Errioxara eta Kantabriara lehenik, eta Madrilera gero. Irungo banaketa taldea 2017an heldu zen Madrilgo erkidegoko iparraldera, Gigante katea erosita, eta eremu horretan gehiago hazteko aukera ikusten du taldeak.

Hala adierazi du Jose Ramon Fernandez de Barrena Uvescoko zuzendari nagusiak: «Espainiako merkatuak hazteko potentzial handia du, eta PAIrekin lan egitea espero dugu, aurrean ditugun proiektu ugariak martxan jartzeko. Gure hazkunde bideari jarraitzeko behar dugun laguntza emango digu». Eskerrak eman dizkie enpresako langileei, bezeroei eta hornitzaileei, «proiektuarekiko erakutsi duten babesagatik eta konpromisoagatik». Eta adierazi du aurrerantzean ere «kalitatezko eta hurbileko» produktuen eskaintza izango dela banaketa taldearen bereizgarria.

Edonola ere, enpresaren indargunea Euskal Herrian bertan dago; 202 saltoki ditu denera: 109 Bizkaian, 59 Gipuzkoan, 27 Nafarroan, eta bederatzi Araban. Eroskiren atzetik, hark du bezero gehien —%20ko merkatu kuota du Araban, Bizkaian eta Gipuzkoan, eta zertxobait txikiagoa Nafarroan—. Guztira, 5.600 langile inguru ditu enpresak.

Inbertsio funts ezaguna

PAI Partners inbertsio funtsa ezaguna da Euskal Herrian. Iaz, esaterako, Angulas Aguinaga Gipuzkoako elikadura enpresa erosi zuen. Beste inbertsio funts bati erosi zion orduan, Espainiako Portobello Capital funtsari, hain zuzen ere. Kapitalaren %50,1 bereganatu zuen.

Bada, Mateo Panike Rumeu inbertsio funtsaren sortzaileetako batek uste du esperientzia hori baliagarria izango zaiela aurrera begira. «PAI Partnersek esperientzia nabarmena du elikaduraren eta kontsumoaren sektorean, eta presentzia handia dauka Espainiako merkatuan ere; beraz, espero dugu erosketa honek konpainia garatzen laguntzea datozen urteetan».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Turistak Donostiako Parte Zaharrean, udan. ©JUAN HERRERO / EFE

Turismoa oso urruti dago oraindik pandemia aurreko datuetatik

Xabier Martin

2021. urteak datu hobeak utzi ditu pandemiaren gordina pilatu zuen urteak baino, 2020ak baino, baina, turista kopuruei dagokienez, heren bat baino gehiago galdu dute Araba, Bizkai eta Gipuzkoak 2019arekin alderatuta.

Lanbideren bulego bat, Donostian ©Juan Carlos Ruiz (Foku)

Langabezia pandemia aurreko mailatik gertu dago Araba, Bizkai eta Gipuzkoan

Jokin Sagarzazu

Ekonomiaren supertzeak eragin du pertsona gehiagok lan bilaketan hastea. Iazko azken hiruhilekoan pixka bat okertu ziren datuak, COVID-19aren aldaerek eragindako murrizketengatik.

<b>EAJko presidente Andoni Ortuzar eta CEOEko presidente Antonio Garamendi.</b> ©LUIS TEJIDO / EFE

CEOE ala ohiko bazkideak, Madrilek horietako bat aukeratu beharko du

Xabier Martin

EAJk berretsi du erreformari ezezkoa emango diola ez bada lan itunen lehentasuna aldatzen. Ortuzarrek patronalari egotzi dio blokeo egoera

 ©JAGOBA MANTEROLA/ FOKU

«Ez dugu zerua ukitu, baina enpresariak ere ez dira kontent»

Joxerra Senar

Nafarroako CCOOko idazkari nagusiak nabarmendu du 2012ko lan erreformako puntu nagusiak eraldatu dituztela.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.