Nafarroako Gobernuak «premiaz» gutxitu nahi ditu itxarote zerrendak

Abuztuan ere igo egin da mediku zain dauden herritarren kopurua: 40.000tik gora dira
Nafarroan hazi egin da espezialisten lehen kontsultaren zain daudenen itxarote zerrenda.
Nafarroan hazi egin da espezialisten lehen kontsultaren zain daudenen itxarote zerrenda. IÑIGO URIZ/FOKU

Uxue Gutierrez Lorenzo -

2019ko irailak 12
Luzatzen ari dira Nafarroako ospitaleetako itxarote zerrendak. Azken datuen arabera, 40.402 gaixo zeuden espezialista batekin lehen kontsulta egiteko zain abuztuan, uztailean baino %6 gehiago. Kasu gehienetan, ez-lehentasunezko gisa sailkaturiko pazienteak dira. Izan ere, espezialistek artatzeko zain dauden herritarrak bi multzotan banatzen dira: lehentasunezkoak eta arruntak; eta zerrendakoen %16,5 soilik ziren lehentasunezkoak abuztuan. Ebakuntzen itxarote zerrendari dagokionez, aldiz, 7.607 izen ageri ditu listak. Osasunbideak, Nafarroako osasun sistema publikoak, esan du itxarote zerrenden hazkundeari galga jartzea «lehentasunezko» zeregina dela. Bada, ordea, azkarrago dabilen zerbitzurik. Lehen arretari dagokionez, adibidez, lautik hiru gaixo egun bateko epean artatzen dituzte.

Ertz ugaritako gaia dela ohartarazi du Osasun Departamentuak. Batetik, zenbait espezialitatetan ikasketa horiek egin dituzten mediku gutxi daude, eta, ondorioz, zaila da langile kopurua handitzea. Eta, bestetik, lehen arretako eta ospitaleetako zerbitzuen arteko lotura hobetu beharko litzateke, Osasunbidearen aburuz. Izan ere, kontrako joerak ageri dituzte ospitaleetako eta lehen arretako zerbitzuetako itxarote zerrendek. Horregatik,«diagnostiko sakon» baten beharra azpimarratu dute Osasun Departamentuko arduradunek, ondoren «egiturazko esku hartzea» egin ahal izateko.

Zenbait neurri iragarri ditu Carlos Artundo Purroy Osasun zuzendari berriak: ordezkapenetarako behin-behineko kontratazioak, kontsulten arteko itxaronaldien kudeaketa berri bat, oporren ondorengo errutinara bueltatzea, ezohiko jardueren berreskurapena, eta, beharrezkoa balitz, gaixo batzuk bideratzea «itunpeko osasun zentroetara». Kontseilariak neurri horiek guztiak jaso nahi ditu itxarote zerrendak murrizteko plan integral berri baten barruan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna