Gipuzkoako Ogasuneko buru ohiari zazpi urteko espetxe zigorra jarri diote

Epaimahaiak frogatu du enpresentzako zerga erregimen berezia baliatu zuela bere intereserako. 1,6 milioi itzuli beharko dizkio Ogasunari
JAVIER ETXEZARRETA / EFE Tamaina handiagoan ikusi

Jokin Sagarzazu -

2020ko otsailak 8

Espetxera joan beharko du Victor Bravok, 1995etik 2003ra Gipuzkoako Ogasuneko zuzendari izandakoak. Donostiako Zigor Epaitegiak zazpi urteko kartzela zigorra jarri dio, hiru delitu fiskal egiteko beharrezko kolaboratzailea izatea leporatuta —zigor bakoitzarengatik bi urte eta lau hilabetekoa—. Fiskaltzak sei urteko espetxe zigorra eskatu zuen, eta Espainiako Estatuaren abokatuak, bederatzikoa. Horrez gain, 3,2 milioi euroko isuna ordaindu beharko du, eta 1,6 milioi euro itzuli beharko dizkio Ogasunari.

Bravoren bazkide Fernando Isidoro Gonzalez Enfedaqueri, berriz, hiru urteko kartzela zigorra jarri diote guztira —akusazioek lau urte eta erdi eskatu zituzten—. Eta milioi eta erdiko isuna ordaindu beharko du. Era berean, biek galdu dute hiru urtez laguntza publikoak lortzeko aukera eta onura edo pizgarri fiskalak edo Gizarte Segurantzakoak jasotzeko eskubidea.

Iazko irailean epaitu zituzten. Epaimahaiak frogatutzat eman du Foru Ogasuneko zuzendari izan zen garaian hasi zela Bravo tratu pribilegiatua ematen Glass Costa bere merkataritza-sozietateari —2001ean sortutakoa— eta harekin lotutako beste batzuei, eta horrek, gerora, aukera eman ziola 2003, 2004 eta 2006ko ekitaldietan zergetan 1,6 milioi euro inguru ez ordaintzeko. Hain justu, 2003. urtean jarri zuen EAJk Espainiako Senaturako zerrendetan, eta aukeratua irten zen; Gipuzkoako Ogasuneko zuzendari kargua utzi ondorengoak lirateke, beraz, egotzitako delituak.

Epaimahaiaren arabera, Bravok baliatu zuen foru aldundiak 1996an Enpresak Sustatzeko Sozietateentzat (ESS) sortutako zerga erregimen berezia. Glass Costaren egoitza fiskala Gipuzkoan ezarri zuen, abantaila fiskal nabarmenak eskuratzeko, nahiz eta herrialdean jarduerarik ez izan. Eta onura horiek lortu zituen egoitza berean erregistratu ziren Gipuzkoa kanpoko beste hainbat enpresa eta norbanakoentzat ere. Glass Costak, berez, Cambrilsen (Herrialde Katalanak) zeukan jarduera nagusia: hotelen eta higiezinen negozioan aritzen zen.

EAJ jopuntuan

Fiskaltzak salaketa jarri eta hamar urte geroago iritsi da epaia. 2007an abiatu zuen ikerketa; garai hartan, EAJren kudeaketarekin lotutako beste kasu batzuk azaleratu ziren, hala nola Balentziaga auzia —Mariano Camio Getariako alkate ohiari zigortu zuten—, eta, geroago, De Miguel auzia —Alfredo De Miguel, Aitor Telleria eta Koldo Otxandiano EAJren Araba Buru Batzarreko burukide ohiak zigortu zituzten iaz, beste hamabi pertsonarekin batera—.

Halaber, Victor Bravoren izena azaldu zen haren anaia Jose Maria Bravoren aurkako auzian. Gipuzkoako Ogasunak Irunen duen ordezkaritzaren buru zela, Jose Maria Bravok hainbat urtez bereganatu zituen harengana jo zuten hainbat enpresak Ogasunari zor zioten dirua. Gaur egun, espetxean dago, 11 urteko zigorra betetzen.

Bravo anaien kasuak aztertzeko bi ikerketa batzorde osatu zituzten batzar nagusietan. Bietan ondorioztatu zuten, Ogasuneko kontrol neurriek huts egin zutela, eta nahieran aritu zirela Bravo anaiak. Victor Bravori egotzi zioten 90eko hamarkadaren bigarren erdian Gipuzkoako Ogasunean eginiko iruzur kasuen erantzukizun osoa.

Bi auzi horiengatik seinalatu zuten kargudun politiko ia bakarra izan zen Bravo; Antton Market Ogasun diputatu ohiaren jarduna ere kritikatu zuten, baina ez zuten erantzukizun penalik antzeman. Hiru ahaldun nagusi ohik deklaratu zuten ikerketa batzordeetan.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ezkerretik eskuinera, Inma Moro, Itziar Llanera eta Begoña Olaskoaga, Arrondegiko osasun etxean. ©LUIS JAUREGIALTZO / FOKU

Aztarnariak zaintzaile

Maite Asensio Lozano

Koronabirusean positibo eman dutenen gertuko kontaktuak bilatzea baino gehiago da aztarnari sistemako kideen lana: gaitzari eta bakartzeari buruzko informazioa emateaz edota zailtasunak dituztenen jarraipena egiteaz ere arduratzen dira.

PCR proba bat, Donostian. ©Idoia Zabaleta, FOKU

Beste 855 positibo atzeman dituzte Hegoaldean

Uxue Rey Gorraiz

Inoiz baino PCR proba gehiago egin dituzte azken egunean: 14.298, zehazki. Horietatik 855 kasutan detektatu dute birusa. 337 Nafarroan detektatu dituzte. Aurreko egunean, laurehunetik gora izan ziren lurralde horretan, lehenbiziko aldiz.

Miren Basaras, EHUko COVID-19aren Zaintza Batzordeko arduraduna. ©EHU

EHUk Miren Basaras izendatu du COVID-19aren Zaintza Batzordearen arduradun

Mikel O. Iribar

Mikrobiologoa eta EHUko irakaslea da Basaras, eta koronabirusaren ikerkuntzan badu esperientziarik. Zaintza Batzordearen lehen erronka EHUko egoera epidemiologikoa zein den aztertzea izango da. 

Moto gidari bat gaur goizean, herritik ateratzeko kontrolean. / ©Idoia Zabaleta, Foku

Sarbideak itxita eta kaleak hutsik Azkoienen

Berria

Normaltasuna izan da nagusi konfinamenduaren lehen orduetan. Herritik irten diren ia denak lan arrazoiengatik irten direa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna