Albistea entzun

Zinegin festibala urriaren 20tik 23ra egingo dute, zenbait berritasunekin

Filmez gain, kontzertuak ere antolatu dituzte. Gaualdi «sataniko» sorpresa ere prestatu dute
Kristof Arotzarena eta Aitziber Zugarramurdi, Zinegin festibalaren antolatzaileak, atzo, Baionan.
Kristof Arotzarena eta Aitziber Zugarramurdi, Zinegin festibalaren antolatzaileak, atzo, Baionan. GUILLAUME FAUVEAU Tamaina handiagoan ikusi

Ainize Madariaga -

2022ko urriak 6

Hazparneko (Lapurdi) igelak hamaikagarren aldikoz zabalduko dio tapiza gorria euskarazko zinemari: Zinegin festibalak ez baitu begirik hetsiko urriaren 20tik 23ra. Fikzioak, dokumentalak, publiko gaztearentzako animazio filmak eta film esperimentalak proposatzearekin aski ez, aurten berritasunak ekarri dituzte antolatzaileek. Batetik, data hilabete batez aitzinatu dute, «ikusgaitasun» gehiago kausitzeko, usaian Euskararen Urtaroarekin edota Euskaraldiarekin bat egiten baitzuen. Bertzetik, larunbat gauean San Paul profetak aurkeztuko duen filma satanikoa zabalduko dute: «Ez dizugu gehiagorik erraten, baina hotzikarak eta zirrarak maite badituzu, xauri!». Ezin izendaturiko filma ezin izendaturiko zuzendariak aurkeztuko du bertan, eta emanaldi hori bereziki azpimarratu dute antolatzaileek, misterioz beterik.

Gainera, kontzertuak emango dituzte: ortziralean txalaparta eta musika elektronikoa uztartzen dituen Mairu taldearena lehenik, eta Anize Ameztoiren Akats sorkuntzak ondotik. Igande arratsean, berriz, Peru Galbetek Uraren oldea zine-kontzertu intimista emanen du, urak zopatutako haurtzaroko diapositiben irudi birsortuek lagundurik.

Gaztetxeko kontzertu gela obretan denez, Haritz Barne zinema aretoaren ondoko pilota plazan muntatuko dute karpa kontzertuen behatzeko.

Lehenbizikotik, 11 urte

Zinegin 2012an abiatu zuten Eihartzea kultur etxeak, Ttattola gaztetxeak eta Haritz Barne zinema aretoak. Geroztik bide egin du, hamaika film eta animazio antolatuz, betiere euskara hutsean. Halaxe baitzen hatsarre hartako xedea: «Euskarazko filmen proiektatzea, eta Hazparnen euskal kulturak bizitzeko behar duen hatsgune bat proposatzea».

XI. festibal honek ere beteko ditu hatsarreko helburu haiek, hondar urteotako euskarazko filmak ekarraraziko baitituzte. Batetik, fikziozko Ane filma, David Perez Sañudok zuzendurik. Bertzetik, publiko gaztearentzako Yoko eta lagunak animazio filma, Juanjo Elordi eta Rishat Gimetdinovek egina. Dokumentalek dute hartuko egitarauaren zatirik larriena: Amikuzeko (Nafarroa Beherea) ikastolaren 50 urteen karietara, haren historia iruditan josi zuten iaz Arño Aizagerrek, Coline Urcun-Markok, Bittor Tikoipek, Martta Irigoien Arrabitek eta Etxek; Xabier Erkizia Martikorena zuzendaria idi gurdiaren karranken bila abiatu da hitzik gabeko O Gemer dokumentalean; Amets Arzallus Antiak Altsasu (gau hura) ekarriko du, Altsasuko (Nafarroa) gertakariak oroitzeko; eta Jon Mikel Fernandez Elorzek Iratxe Sorzabal Diazek pairatu zituen torturak islatuko ditu Bi Arnas dokumentalean. «Euskal Herriko egoeren lekuko bortitz ta hunkigarriak dira», erran dute antolatzaileek. Azkenik, Bost teilatu lanean ikusi ahal izanen dira Amancay Gaztañaga, Erika Olaizola, Josu Martinez, Leire Egaña, Eñaut Castagnet eta Raul Barreras zuzendarien bortz istorio labur.

Ahantzi gabe, filma bat nola muntatu ikasteko parada eskainiko du Zineginek aurten, Lukas Hiriartek emaniko mash up tailerrari esker.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Bertsolari Txapelketa Nagusiko finalaurrekoa, 2 itzulia: Bilbo

Bilbon erabakiko da zein zazpi bertsolari sailkatuko diren finalerako

Olatz Enzunza

Zazpigarren eta azken finalaurrekoa jokatuko da gaur Bilbon. Aitor Mendiluze Gonzalez, Amets Arzallus Antia, Joanes Illarregi Marzol, Jone Uria Albizuri, Maddalen Arzallus Antia, eta Saioa Alkaiza Guallar arituko dira kantuan. Idoia Anzorandia Kareaga izango dute gai jartzaile.
 

Aitor Mendiluze eta Amets Arzallus, atzo, elkarrekin kantuan, hamarreko txikiko ariketan. ©MARISOL RAMIREZ / FOKU

Ez da ate ondoan geratu

Miren Mujika Telleria

Amets Arzallusek Bilbon irabazi ondoren, erabakita gelditu da finala. Harekin batera ariko dira Illarregi, Ibarzabal, Gaztelumendi, Colina, Mendiluze, Martin eta Lujanbio
 ©ARITZ LOIOLA / FOKU

«Beharbada gu ere iraultza bat bizitzen ari gara»

Itziar Ugarte Irizar

Etorkizun hurbilean, Parisen, hiria errefuxiatu klimatikoz beteta dagoenean eta ia jende guztiak errealitate birtualerako betaurrekoak aldean daramatzan inguru batean girotu du idazleak 'Berriz zentauro' eleberria. Agertokiak agertoki, baina, adin ertaineko emakume baten galderak ikusten ditu ardatzean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Ainize Madariaga

Informazio osagarria

Iruzkinak kargatzen...