Zinema eta zientzia eskuz esku

Bihartik martxora bitarte, 11 film proiektatuko dituzte Donostiako Tabakaleran eta Bilboko Arte Ederren Museoan, 'Zinema eta zientzia' zikloan. Zientzialariek aurkeztuko dituzte emanaldiak
Ricardo Diez Muiño (DIPC), Joxean Fernandez (Euskadiko Filmategia), Edurne Ormazabal (Tabakalera), Pedro Miguel Etxenike (DIPC), Jose Luis Rebordinos (Zinemaldia) eta Miguel Zugaza (Bilboko Arte Ederren Museoa).
Ricardo Diez Muiño (DIPC), Joxean Fernandez (Euskadiko Filmategia), Edurne Ormazabal (Tabakalera), Pedro Miguel Etxenike (DIPC), Jose Luis Rebordinos (Zinemaldia) eta Miguel Zugaza (Bilboko Arte Ederren Museoa). A. CANELLADA / FOKU Tamaina handiagoan ikusi

Ainhoa Sarasola -

2020ko urtarrilak 9

Hirugarren urtez, Zinema eta zientzia zikloa antolatu dute Euskadiko Filmategiak eta DIPC Donostia International Physics Center erakundeak; aurten, lehen aldiz, Donostiako Zinemaldiarekin elkarlanean. Kultura zinematografikoa eta zientifikoa uztartzea eta biak elkarrekin dibulgatzea du xede zikloak. Horretarako, zientziarekin harremana duten 11 film erakutsiko dituzte aurten. Izen handiko zientzialariek aurkeztuko dituzte emanaldiak, Donostiako Tabakaleran eta Bilboko Arte Ederren Museoan egingo dituztenak. Bihar izango da lehena: Agora (Alejandro Amenabar, 2009) erakutsiko dute Tabakaleran —hurrengo egunean emango dute Bilboko museoan—, eta Pedro Miguel Etxenike DIPCko presidenteak egingo ditu aurkezpen lanak.

Erlijioaren eta zientziaren arteko eztabaida du ardatz proiektatuko duten lehen filmak, baina zientziaren askotariko arloak izango dituzte aztergai martxora bitarte emango dituzten gainerako lanek ere. Gattaca (Andrew Niccol, 1997) filmak, esaterako, manipulazio genetikoaz gogoeta egiteko aukera emango du. Emakume astronauta bat du protagonista, berriz, Proxima-k (Alice Winocour, 2019), iazko Donostiako Zinemaldian Sail Ofizialean estreinatu zutenak. Adimen artifiziala da Her (Spike Jonze, 2013) lanaren gai nagusia, eta robotikaren munduan dago girotua Autómata (Gabe Ibañez, 2014).

Despertares (Penny Marshall, 1990) filmak neurologia hartuko du hizpide, eta Ad Astra (James Gray, 2019) lanak, berriz, barne-bidaiak eta espazio-abenturak uztartuko ditu. Zientzia-fikzioari dagokionez, bi film bildu dituzte aurtengo egitarauan: X: The Man with the X-Ray Eyes (Roger Corman, 1963) eta Frau im Mond (Fritz Lang, 1929).

Halaber, programazioan bada itxuraz zientziarekin harreman agerikorik ez duen film bat: Gilda (Charles Vidor, 1946). Baina zikloan sartzeko arrazoia azaldu dute antolatzaileek: traman bada wolframari lotutako hari bat ere. Horiez guztiez gain, The Tree of Life (Terrence Malick, 2011) filma ere erakutsiko dute.

Berritasunik ere badu hirugarren edizioak; izan ere, proiekzioez gain, bost hitzaldi izango dira aurten, beste horrenbeste zientzialariren eskutik. Halaber, Frau im Mond filmaren emanaldian zuzeneko musika jarriko du Javier Perez de Azpeitia piano jotzaileak.

Bestetik, Gilda, Bilbora eta Donostiara ez ezik, Donibane Lohizuneko (Lapurdi) Le Select zinema aretora ere eramango du zikloak —hilaren 21ean izango da emanaldia—. Ikastetxeei zuzendutako proiekzioak ere egingo dituzte zikloan: The Day After Tomorrow (Roland Emmerich, 2004) ikusi ahal izango dute ikasleek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Albiste gehiago

Toti Martinez de Lezea idazlea, gaur goizean, Donostiako Parte Zaharrean. ©Gorka Rubio / Foku

Toti Martinez de Lezeak 'Egurra S.A.' eleberria plazaratu du

Itziar Ugarte Irizar

Intrigazko nobela da, industria editorialaren miserietan girotua. Ereinekin eman du, eta aldi berean kaleratu ditu gaztelaniazko jatorrizkoa eta euskarazkoa; Miren Arratibelek egin du itzulpena.

Jon Insausti, Josemi Beltran eta Patxi Presa, atzo, Donostiako Viktoria Eugenia antzokian; erdian, aurtengo edizioaren kartela. ©IDOIA ZABALETA / FOKU

Panpinen madarikaziopean

Itziar Ugarte Irizar

Ostiralean hasiko da Fantasiazko eta Beldurrezko Zinemaren 31. Astea Donostian, eta 50 film inguru erakutsiko ditu azaroak 6ra bitarte: genero horretako urteko ale nabarmenetako batzuk nahiz zenbait klasiko

Celia Eslava aristaren erakusketako irudi bat. ©IÑIGO URIZ/ FOKU

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna