Albistea entzun

Euripides feminista bat

'Bakanteak' tragedia klasikoaren gaurkotze bat taularatuko dute Dantzertiko ikasleek, ostiralean, Getxon: 'Basatiak-Animales salvajes'
Dantzertiko arduradunak eta antzezlaneko aktore nahiz zuzendariak, herenegun, Getxon.
Dantzertiko arduradunak eta antzezlaneko aktore nahiz zuzendariak, herenegun, Getxon. GETXOKO UDALA Tamaina handiagoan ikusi

Iñigo Astiz -

2022ko maiatzak 25 - Getxo

Ozen entzuten da techno musika Getxoko Muxikebarri antzokiko bozgorailuetatik (Bizkaia), eta, Namaste bitches dioten neonezko argien azpian, erori eta zutitu, euforia betean ari dira dantzan sei aktore, espresuki diskotekarako jantzitako txandal dirdiratsuekin. Liskarra sortu da haien artean: neskentzako antolatu dute festa neskek, eta mutilak ez du zergatik ulertzen. «Gizon izateagatik diskriminatzen gaituzue!». Hain zuzen, genero arrakala hori da Basatiak. Animales Salvajes antzezlanaren ardatza. Gaur izango du estreinaldia, Getxon bertan, eta Dantzerti Euskadiko Arte Dramatiko eta Dantza Goi Mailako eskolako laugarren mailako ikasleek taularatuko dute obra. Euripides idazlearen Bakanteak tragedia klasikoaren bertsio bat da funtsean, baina 2018ko martxoaren 8an kokatuta. Javier Liñera antzerkigileak egokitu du testua eta Maria Goirizelaiak zuzendu du obra. Nahasian joango dira euskara eta gaztelera obran, eta gaur ez ezik, bihar eta etzi ere egongo da ikusgai Muxikebarrin, eta Gasteizko Felix Petite antzokian ere bai, ekainaren 2an.

«Bertsio librea da», onartu du Liñerak. Baietz, Euripidesena dela oinarria, baina erabat libre egin duela egokitzapena. «Euripidesek bizitako gizartea erakusten du haren antzezlanak ere. Emakumeak erabateko periferian zeudelako orduan, hiritar izateko eta gurtzarako eskubiderik gabe». Eta antzera bere bertsioan ere. Dena festa giro horretan bildurik.

Feminismoa eta kultura urbanoa. Goirizelaiaren hitzetan ere, bi zutabe horiek baliatu dituzte antzezlana eraikitzeko. Horregatik, antzezten ez ezik, dantzan eta kantuan ere arituko dira aktoreak. Tarteka, rapean ohiko diren oilar borrokak ere eszenaratuko dituzte aktoreek, eta genero desberdintasuna izango da gatazkaren funtsa, kasu horretan ere.

Laugarren urtea

Zazpi urte dira Dantzerti martxan hasi zenetik, eta, beraz, gradua lortuko duen laugarren ikasle labealdia da hau. Sei aktore, guztira: Maialen de Pablos, Libe Estebaranz, Alejandro Gibaja, Amaia Iriondo, Nahia Sillero eta Sofia Zallio. Hilabete daramate guztiek Getxon antzezlana prestatzen.

Aurrez ere, urtero taularatu dute antzezlan bat azken kurtsoko ikasleek, baina etenaldia ekarri du hor ere koronabirusak eragindako osasun krisiak. Bertan behera utzi behar izan zuten duela bi urte proiektu hori, eta maskarak jantzita aritu behar izan zuten iaz. Horregatik, itzulera moduko bat da aurtengo proposamena, Naomi Santisteban Dantzertiko zuzendariak esan duenez. «Orain berreskuratu dugu aurrez aurrekoa». Eta ikasleei lehen mailako profesionalekin lan egiteko aukera eskaini dietela nabarmendu du Unai Izquierdo Dantzertiko zuzendariordeak. «Apustu handia da, eta inbertsioa ere bai. Beste alor batzuetan estutu behar izan dugu gerrikoa».

Orain arte ere, euskara eta gaztelera nahasiz egin dituzte gradu amaierako proiektuak ikasleek. Izquierdo: «Ekoizpen batzuetarako konpainiek euskarazko bertsio bat eta gaztelaniazko beste bat prestatzen dute, baina guk erabaki dugu, normalizazioaren alde, bi hizkuntzetan egitea zuzenean».

Dantza gradua ere eskaintzen du zentroak, bestalde, eta gaur gradua amaitzekotan diren dantzariek ere lau emanaldi eskainiko dituzte Getxon, antzezlanaren aurretik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Noaingo Faktoria zentro koreografikoko ikasleak. Beltzez, Laura Armendariz irakaslea. ©Iñigo Uriz / FOKU

Dantzaren nazioarteko mapan

Edurne Elizondo - Nafarroako Hitza

Noaingo Faktorian lanean ari da, irailetik, zentro koreografiko horretako ikasleen bosgarren belaunaldia. Marta Coronadok, Laida Aldazek eta Carmen Larrazek jarri zuten proiektua martxan, 2019an, herrialdeko dantza garaikideari astindu bat emateko. Pedagogia eta sorkuntza dituzte ikur.

 ©JAIZKI FONTANEDA / FOKU

«Sorkuntza jada ez da nire munduaren zilborra»

Aitor Biain

Ez du diskorik egin plazan egoteko; plazan dago jada. Baina '#itsasoadabidebakarra' bere bakarkako lehen diskoa kaleratu du, pertsonala bezain kolektiboa den lana. Azken urteetako bizipenetatik abiatuta ondu du, eremu abisaletik ur azalera ateratzeko bidea oinarri hartuta, eta Kubatik joan-etorria egin duten kantuekin.
Gaur egungo musikariez inguratu da John Cale <em>Mercy</em> disko berria ontzeko. ©MADELINE MCMANUS

Erortzen ari den munduaz

Mikel Lizarralde

81 urte betetzear dela, John Calek segitzen du pauso bat aurretik, 'Mercy' bere azken diskoak erakusten duenez. Klasizismoaren eta abangoardiaren artean beti.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...