Letrak astinduko dituzte

Letrazaurituak literatura feministako jaialdia egingo dute urriaren 3tik 10era, bigarrenez, Iruñean
Nerea Madariaga eta Carolina Otamendi antolatzaileak, atzo, jaialdiaren aurkezpenean.
Nerea Madariaga eta Carolina Otamendi antolatzaileak, atzo, jaialdiaren aurkezpenean. IÑIGO URIZ / FOKU Tamaina handiagoan ikusi

Ane Eslava -

2020ko irailak 25

Lehen aldian arrakasta handia izan ondoren, Letrazaurituak «edizioaren panorama astintzen duten emakumeen topaketa» antolatu dute berriz, literaturaren esparruan andreek egiten duten lana aztertzeko, ikusarazteko eta goraipatzeko. Urriaren 3tik 10era egingo dute, Iruñean, helburu argi batekin: literatura «desberdin» bat dibulgatzea. «Kritikoak izaten, aztertzen, elkarri ulertzen, gauzak zalantzan jartzen eta geure buruak zein gainerakoak ezagutzen irakasten digun literatura bat», Nerea Madariaga antolatzaileak zehaztu duenez. Trapezistaren Zorabioa kultur elkarteak eta Katakrakek bultzatu dute egitasmoa, eta Nafarroako Gobernuaren, Iruñeko Udalaren, Nafarroako Kutxa Fundazioaren eta Nafarroako Berdintasun Institutuaren laguntza jaso dute.

Iaz sortu zuten Letrazaurituak proiektua, «emakume idazleen joera berri baten literatur kalitatea eta irismen soziala lantzeko eta ospatzeko» grinak bultzatuta. «Proiektuaren beharra sortu zen irakurle gisa argi genuelako emakume asko kalitate handiko literatura sortzen ari direla, eta, literatura horrek indar estetiko handia izateaz gain, diskurtsoak sortzeko gaitasuna ere baduela; baita errealitateari, genero auziari, emozioei eta, azken batean, gai indibidual eta kolektiboei buruzko gogoeta ildoak sortzekoa ere. Gai horiek, askotariko literatura generotatik jorratuta, irakurle gisa eta gizarte gisa heldulekuak aurkitzeko modua eskaintzen digute, geure burua eta mundua zalantzan jartzeko», azaldu du Madariagak.

Beharrezkoa zela sinetsita, proiektuak erroak bota zitzala nahi izan zuten hasieratik: «Jarraipena izan zezala; erreferentziazko jaialdi feminista eta literarioa bihur zedila». Aurten, ziurgabetasunak gorabehera, ahalegin berezia egin dute aurrez aurre izan zedin, «elkargune» izaerari garrantzi handia ematen diotelako.

Proposamen nagusia bost topaketa izango dira: urriaren 6tik 10era, egunero, ibilbide nabarmendua duten bi emakume izango dira solasean, 19:30ean, Katakrakeko aretoan. Hizlari gehienak idazleak izango dira, baina editoreak, filosofoak eta kritikariak ere izango dira, eta literatur munduan diharduten emakume gisa zeharkatzen dituzten hainbat gai jorratuko dituzte, letren inguruan aritzen diren andre nafarrek gidatuta.

Belen Gopeguik (Madril, 1963) eta Anna Pachecok (Bartzelona, 1991) zabalduko dute zikloa urriaren 3an. Belaunaldi ezberdinetako idazleak dira, baina errealitatea fikzioan islatzeko antzeko ereduak lantzen dituzte biek, eta horietaz arituko dira, Itziar Romerak gidatuta. Hurrengo egunean, Nuria Labarik (Santander, Espainia, 1979) eta Silvia Nanclaresek (Madril, 1975) amatasunaren gaia jorratuko dute, Leire Escaladak moderatutako hitzaldian: aztertuko dute nola eramaten den amatasuna literaturara, eta nola egin duten haiek beren obretan. Ondoren, Maria Sanchez (Kordoba, Espainia, 1989) eta Andrea Abreu (Icod de los Vinos, Espainia, 1995) lengoaia literarioaren eta poetikoaren bitartez landa eremua eta natura kontatzeko moduei buruz arituko dira, urriaren 8an, Nerea Aguadoren gidaritzapean. Hilaren 9an, Aixa de la Cruz (Bilbo, 1988) eta Elizaveth Duval (Alcala de Henares, Espainia, 2000) autofikzioa eta literaturara eramandako intimitatea izango dituzte aipagai, Irati Iturritzarekin batera. De la Cruzek, gainera, sormen literarioaren tailer bat ere eskainiko du urriaren 10ean, Katakraken. Azkenik, «amaiera bikain» gisa, iaz Espainiako Literaturaren Sari Nazionala jaso zuen Cristina Morales arituko da, Gabriela Wienerekin batera, urriaren 10ean. Esperimentazioaz, abangoardiaz, generoen apurketaz eta errealitatearen tratamendu politikoaz mintzatuko dira, Beatriz Canterok moderatuta.

Proposamen eszenikoa

Topaketez gain, aurten ikuskizun bat ere antolatu dute: Isabel Calderonek eta Lucia Litjmaerrek Deforme Semanal antzezlana taularatuko dute urriaren 3an, Gaiarre antzokian. Obrak arrakasta handia izan du Madrilen eta Bartzelonan, eta lehen aldia izango da hiri horietatik kanpo antzeztuko dutena.

Mahai inguruetan 50 pertsonarentzako tokia izango da, eta izen emateak posta bidez egin beharko dira, letraheridasencuentros@gmail.com helbidera mezu bat bidalita. Halaber, ekitaldi guztiak jaialdiaren Youtubeko kanalean jarraitu ahal izango dira, zuzenean. De la Cruzen tailerra hamabost lagunentzat izango da, eta kasu horretan ere postaz eman beharko da izena. Antzerkirako sarrerak, berriz, Gaiarreko webgunean eta leihatilan egongo dira salgai.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Bisitari bat Bilboko Rekalde aretoak Agustin Ibarrola artistari eskainitako erakusketan ©Miguel Toña/Efe

Ibarrolaren unibertso artistikoak bete du Bilboko Rekalde aretoa

Iñigo Astiz

Agustin Ibarrola sortzailearen azken lau hamarkadetako 70 lan inguru biltzen ditu 'Agustin Ibarrola, naturalki' erakusketak, eta Jose Ibarrola seme eta artistak egin ditu komisario lanak

 ©KURSAAL ESZENA

«Maitatua eta sostengatua sentiarazten nau publikoak»

Ainhoa Larretxea Agirre

Hirugarren diskoa aurkezteko bira bertan behera utzi ondotik, Kursaalean izango da Izaro bihartik aurrera. Pandemiatik bizirik atera izana ospatzearekin «nahikoa» du, oraingoz.
<em>Ama Kuraia</em> antzezlaneko lantaldea, joan den otsailean Bilbon egindako aurkezpenean. ©ARITZ LOIOLA / FOKU
Lander Garro idazlea ©Berria

Lander Garrok irabazi du nobelak idazten laguntzeko Agustin Zubikarai saria

Iñigo Astiz

Euskal Herriko giro nahasitik ihesi Bartzelonara doan Xabi Ugarte pertsonaiaren nondik norakoak ditu ardatz proiektuak, eta 'Faith' du behin-behineko izenburua.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna