'Beautiful Boy'
Zuzendaria: Felix Van Groeningen. Aktoreak: Timothee Chalamet, Steve Carell, Maura Tierney, Amy Ryan. Herrialdea: AEB. Iraupena: 120 minutu.Asko dira drogazaletasunaren inguruan egin diren pelikulak, horietako batzuk bikainak, eta Van Groeningen belgikarra bere lehen film estatubatuarrean gai horretan murgilduko da bete-betean.
Hain zuzen, metanfetaminen ondorioetan zentratuko da, droga mota horrek eragiten duen mendekotasun ia gaindiezina pantailaratuz. Klase ertain-altuko familia baten bitartez egiten du; semeak dena omen du bizimodu ohiko bat aurrera eramateko, baina tartean drogekiko zaletasuna gurutzatuko zaio.
Beautiful Boy-ren abiapuntuak, originala izan gabe, hainbat elementu interesgarri ditu. Batez ere, aitaren dilema morala, noiz arte lagundu behar duen gaixorik dagoen semea, eta noiz eman behar duen amore eta bere bizimoduarekin segitzen saiatu. Erabaki hori hartzeko mementoa da pelikularen klimaxa.
Gainerakoan, zertxobait errepikakorra egingo da adikzio-terapia binomioa, eta hainbat elementutan sakondu ez izanak ez dio onik eginen filmari. Horrez gain, behar zenean ez du amaituko zuzendariak, eta horrek dezente bigunduko du azken emaitza.
