Jon Elortegi. Urdaibaiko entrenatzailea

«Arraunean ez dute izenek egiten, arraunlariek baizik»

Gustura dago Urdaibaiko entrenatzailea taldeak neguko prestaketan egin duen lanarekin, eta bere aginduetara duen arraunlari multzoaren balioa goretsi du: «Irabazteko gosea eta amorrua daukate».
JON ELORTEGI Tamaina handiagoan ikusi

Aitor Manterola -

2020ko martxoak 26

Lehen hilabeteak ari da egiten Urdaibaiko entrenatzaile lanetan Jon Elortegi (Barrika, Bizkaia, 1977), eta gustura dago egindakoarekin. Orain, koronabirusaren eraginez, bide hori eten egin da.

Zerk kezkatzen zaitu gehien egoera honetatik?

Blokea osatzeko hain beharrezkoa den uretako lana galtzen ari gara. Bestelakoan, arraunlariak oso profesionalak dira, eta egunero ari dira entrenatzen. Lortu dugu denek ergometroa izatea etxean eta lana ondo egitea.

Lehiaketarekin gerta daitekeenak ere kezkatuko zaitu, ezta?

Hau asko luzatzen bada, kezkatzen nau nola geratuko diren uda hasierako estropadak eta Eusko Label liga bera. Arraunarentzat atzerapauso itzela izango litzateke liga ez jokatzea. Nahiz eta berandu hasi, jokatu egin beharko litzateke. Agian, ez da izango aurreko urteetako bezalako maila onekoa liga hasieran, baina joka dadila.

Hau asko luzatuko balitz, liga beste formatu batean jokatzearen alde zeundeke?

Estropadak motzago izateak, adibidez, ez luke zentzurik izango. Galduko litzatekeena traineruen abiadura izango litzateke, talde guztiak baikaude egoera berean.

Zer moduz zihoan taldea orain arteko prestakuntzan?

Lan asko eta ona egin dugu neguan. Espero genuen maila eman dugu jaitsieretan.

Hasieratik ari zara udan talde nagusia izango denarekin lanean?

Ez, nahasian ibili gara duela hilabete arte. Orain, taldeak bereizteko momentuan harrapatu gaitu egoera honek.

Zergatik ibili dituzu nahasian arraunlariak?

Klubarentzat oso garrantzitsua da B taldea uretan izatea, Bermeoko arraunlari gazteek arraun egin ahal izateko, eta ahalik eta gehien nahi genuen luzatu nahasian entrenatzeko aldia. Bigarren taldeak ere baldintza onetan atera behar du uretara udan.

Iazko arraunketarekin alderatuta, ezberdina da aurtengoa?

Bai. Betiko arraunketa gustatzen zait, luze egitea. Arraunlariak normaltasunez sentitzen duen hori bultzatu baino ez dugu egin.

Gaur egun, ez dago sekulako aldea arraunketa motetan, ezta?

Duela urte batzuk, bai, Astilleroren garai onen hasieran, adibidez. Baina, orain, bi daudela esango nuke: bat Hondarribiarena da, atzean asko geratuz egiten dena; eta bestea betikoa da, gu ezartzen ari garena taldean.

Hainbat arraunlari izango dira berriak aurtengo Urdaibain. Zergatik hautatu zenituen horiek?

Egokienak direlako iazko taldetik dauden zuloak betetzeko. Ondo osatu dugu trainerua, eta aldaketak egiteko aukera izango dugu. Lehen zeudenak eta berriak lehian ari dira postua lortzeko.

Inoiz baino izen gutxiagoko arraunlari gehien izango ditu aurten Urdaibaik?

Arraunean ez dute izenek egiten, arraunlariek egiten dute. Oriok, adibidez, iazko taldean izen asko aldatu zituen, eta liga irabazi zuen. Gurean ere ez dago zergatik maila jaitsi. Orain izen potoloa dutenek hemen egon zirenean ez zuten izen handirik, eta emaitza bikainak lortu zituzten.

Zer itxura hartu diezu aurkariei?

Iazko egoera. Sei traineru oso indartsu daude, edozein egunetan irabazteko aukerekin, eta, bi izen ematekotan, Orio eta Hondarribia emango nituzke.

Urdaibaira itzuli zarela, taldearen barruko lehengo giroan zerbait aldatu dela ikusi duzu?

Ez. Arraunlariak lagunak dira, oso gustura daude elkarrekin, arraunean eta hortik kanpo. Urdaibairen balio handi bat da kirolari handiak eta pertsona handiagoak direla, oso lagunak.

Lehen taldekide izan zenituen batzuen entrenatzaile zara orain. Handia da aldaketa?

Ondo hartu naute. Zuzendaritzak entrenatzailea hautatzerakoan, arraunlariei galdetu zien, eta ni izatearen alde azaldu ziren. Horrelako talde bateko aldagelan ondo sartzea oso garrantzitsua da.

Berdina da Deustu eta Urdaibai entrenatzea?

Lana bera da, baina Bermeon maila handiagoa dago, eta aginduak azkarrago xurgatzen dituzte arraunlariek. Deustun ere kirolari eta pertsona oso onak zeuden, eta oso gustura ibili nintzen. Irabazteko presioari dagokionez, norberak jartzen dio bere buruari. Urdaibain badago bestela ere dena irabazteko presioa, eta horrekin ere bizi egin behar da.

Iazkoa hobetzeko, ez duzue asko beharko.

Bai. Oso urte txarra izan zen, eta irabazteko gose eta amorru handia dago taldean; hori onerako izango dugu aurten.

Urdaibain, entrenatzaileak ez omen du laguntzeko jende asko izaten alboan.

Prestatzaile fisikoa eta laguntzailea dauzkat. Horretan ez dut kexarik. Bestela, zuzendaritzan, egia da ez dagoela jende asko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Grosjeanen mezua, istripuaren ondoren

Halo segurtasun sistemak bizia salbatu diola iradoki du Grosjean pilotuak

Edu Lartzanguren

Eskuetan erredurak ditu 1 Formulako gidariak, atzo istripua eduki ondoren. Halo sistemaren aurka egon zen pilotu suitzarra hura ezarri zutenean.

Barrenetxea, Realaren eta Villarealen arteko partidan. ©Jon Urbe / Foku

Realak eta Athleticek ezin izan dute irabazi

Berria

Realak bana berdindu du Vila-realen aurka, Anoetan. Athleticek ere emaitza bera eskuratu du Getafaren zelaira eginiko bisitan. Osasunak, berriz, lau gol jaso zituen Bartzelonan.

Erik Jaka txapeldun

Erik Jaka txapeldun

Jon Eskudero

Hasieratik aurrea hartu ondoren, aldea ongi kudeatu, eta bizitzan estreinakoz buruz buruko txapeldun izan da Erik Jaka. Bukaeran sufritu arren, 22 eta 20 irabazi dio Jokin Altunari. 

Jaka eta Altuna, pilota aukeraketan. ©Gorka Rubio / Foku

Txapela, sentimenen gainetik

Julen Etxeberria

Jokin Altunak eta Erik Jakak buruz buruko finala jokatuko dute gaur, Bilbon. Lagun minak dira, baina kantxan alde batean utziko dute euren adiskidantza, saririk handiena baitute jokoan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.