Albistea entzun

KRITIKA. Antzerkia

Erdu! Ondo etorria!

Harrobia zentroan egin dute jaialdia.
Harrobia zentroan egin dute jaialdia. BERRIA Tamaina handiagoan ikusi

Agus Perez -

2021eko apirilak 28

Erdu! jaialdia

Konpainiak eta lanak: Anita Maravillas (Kotondarrak), Yarleku (Etxerik txikiena), Atx (Kaskarot), Itzuli (Behin bazen internet). Lekua: Bilboko Harrobia zentro eszenikoa. Eguna: Apirilak 23, 24 eta 25.

Igaro berri den asteburuan izan da Bilboko Harrobia zentro eszenikoan Erdu! euskarazko haur-antzerki jaialdiaren lehen edizioa, eta programazioaren kalitatea ikusita, espero dugu jarraipen oparoa edukitzea datozen urteetan.

Kotondarrak deitu zen lehen eguneko pieza, kotoiari nolabaiteko aipamena eginez. Izan ere, bi ahizpa txikiren eta euren amaren bidez azaldutako istorioak industria iraultzaren arora eraman gintuen, argumentuaren muina ehungintza lantegi batean gertatzen delako. Beren jaioterritik hirira egindako bidaian ezagutu genituen bi neskatoen izaera diferenteak, eta ama lantegian hasi ostean etorri ziren ugazabaren diru gosea eta langileen eskubideen aldeko borroka. Anita Maravillas konpainia eredugarri ibili zen panpinen maneiuan diorama moduko eremu eszeniko zoragarrian, eta euskararen erabilera urri-urria izan bazen ere —aditzik gabeko berba solte batzuk baino ez— kanta ezagun batzuekin konpentsatu zen gabezia.

Askoren ustez, bigarren emanaldia izan da egitarau osoan maila altuena erakutsi duena. Iruñeko Yarleku konpainiaren Etxerik txikiena-k gerratik ihes egindako neskato biren istorioa erakutsi zigun. Errefuxiatuen kanpaleku batean bizi dira orain, ahal dutenarekin egindako etxola batean, eta haien arteko hasierako etsaitasuna laguntasun polit bilakatuko da emanaldian zehar. Umore-uneak, samurtasuna, herrimina, beldurra eta segurtasun eza dira beren eguneroko ogia, eta hori guztia dosi neurritsuetan eman ziguten, argiztapen landuan eta musika eder batzuetan lagunduta.

Aipatzekoa da lan honek interpretazio saria eskuratu zuela Espainiako FETEN jaialdian, eta objektuen antzerkitzat ere jo daitekeela pasarte batzuetan. Emozio asko eta handiak eragin zizkigun emanaldiak eta ni seguru nago ikusle egondako ume askok heldutasunerako jauzi nabarmen bat eman zutela goiz hartan beren gurasoen konpainian. Horren kontura, horra hor anekdota bi. Baga: irteeran seme batek amari galdezka: «Ama, baina ume horiei zer gertatzen zaie? Gu bezalakoak dira?». Biga: Iruñeko emanaldi baten ostean afrikar jatorriko neskato bi beren artean zeuden hizketan, eta batak besteari diotso: «Bada, niri ez zait batere gustatu, gauza batzuk —gauza batzuk— gogorarazi dizkidalako».

Hirugarren pieza —Kaskarot— orriotan komentatu nuen aspaldi, eta egitaraua amaitzeko Baionako Itzuli konpainiak Behin bazen internet eskaini digu Hegoalderako primizian. Izenburuak dioen bezala, informatika-sareen barrunbeetan bizi dira protagonistak, eta argiaren abiaduran mugitzen dira informazio-paketeak hara-hona eramateko. Printzipioz, gai zaila edo teknikoegia irudi lezake, baina pertsonaien izaera humanoari esker polita eta entretenigarria suertatu da istorioa, eta umeak laster geratu dira harrapatuta kontakizunean. Gainera, Maryse Urrutik gaitasun itzela erakutsi du haiek denak —hamabi guztira— gorpuzteko eta rol batetik bestera argiaren abiaduran ere igarotzeko. Horrek guztiak gehi Elodie Duquieren irudi proiektatuek eta animazioek entusiasmo nabarmena sortu dute ikusleengan, azken txalo zaparradak erakutsi duen legez.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

<b>Artze anaiak.</b> Txalaparta erakustaldia Iruñeko 1972ko Topaketetan. ©BERRIA

ARTE KONSTELAZIO BAT IRUÑEARI OPARI

Yasmine Khris

Iruñeko 1972ko Arte Topaketen 50. urteurrena ospatuko da aurten, eta orduko oroitzapenak bizirik dituzte batzuek. Xabier Morras margolariak, esaterako, kontrastez beteriko hiriaren irudia ekarri du gogora. Zentsurak, polemikek eta artisten aniztasunak ezaugarritu zuten topaketa.

 ©BERRIA

«72ko topaketen oroitzapena ez da anekdotikoa, baina ia»

Yasmine Khris

Ofizioz idazlea da Andres, baina komisario lanean arituko da aurten, 1972-2022ko Topaketetan. Urriaren 6tik 18ra eginen dira eta 70 jardunaldi baino gehiago antolatzeaz arduratu da.
Walter Salas-Humara (eskuinean), gaur egun The Silos osatzen duen hirukotearekin. ©BERRIA

Musikaren plazera

Mikel Lizarralde

1980ko hamarkadan AEBetan sortutako sustraidun rockaren ordezkari da The Silos, Walter Salas-Humararen proiektua. Bi kontzertu ditu Euskal Herrian egunotan.

Mende erdia bete berri da Alejandra Pizarnik hil zela. ©BERRIA

Zauri diren lerroak

Ainhoa Sarasola

Sufrimendu biziko aldiak eta sormen loraldiak tartekatu ziren Alejandra Pizarnik idazle argentinarraren bizialdi osoan. Beldurrari, maitasunari eta bakardadeari idatzi zien, eta XX. mendeko poema bilduma nabarmenetako bat osatu zuen. 50 urte bete dira hil zenetik.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...