Magia egunak Getxon

Magoak bakarka zein taldeka arituko dira Getxo Magik jaialdiaren barruan, igandera arte. Ekitaldi nagusia bihar arratsaldean izango da
Imanol Ituiño ariko da Getxon, beste askoren artean.
Imanol Ituiño ariko da Getxon, beste askoren artean. MARISOL RAMIREZ / FOKU

Amaia Igartua Aristondo -

2019ko uztailak 12
Igandera arte, Getxo Magik jaialdia egingo dute Bizkaiko udalerri horretan. Umeek zein helduek gozatzeko ikuskizunak egongo dira; gehienak, doan, eta asko, euskaraz.

Ekitaldi nagusia bihar izango da. Jaialdian parte hartuko duten magoetako bost batera ikusteko aukera egongo da, galako zuzendariaren gidaritzapean. Hainbat magia estilo jorratuko dituzte: besteak beste, umore magia, mentalismoa eta magia poetikoa. Ikuskizuna elebiduna izango da: euskaraz eta gazteleraz. Ordainpeko ekintza bakarra izango da: hiru euroan daude sarrerak salgai. Algortako Muxikebarrin izango da, 20:00etan.

Gaur, hiru gunetan izango dira emankizunak, Itzubaltzeta eta Areeta auzoetan: Metro eta Santa Eugenia plazetan eta Gobelondon. Bakoitzean mago bat egongo da: Imanol Ituiño, Tor eta Altrius, hurrenez hurren, eta hiruna emanaldi egingo dituzte: 19:00etan, 19:30ean eta 20:00etan. Horrekin batera, 6 urtetik gorako umeentzako magia tailerra emango dute, gaur, Itzubaltzetako kultur etxean, 17:30ean.

Umeentzako tailer gehiago ere egongo dira asteburuan. Larunbatean, 11:00etan, Txoborro magoa arituko da irakasten, euskara hutsean, Algortako Villamonte kultur etxean. Igandean, aldiz, arratsaldean izango da saioa; oraingo honetan, Altrius magoarekin: 17:30ean, Andra Mariko plazan, gaztelaniaz.

Umorea ere ez da faltako. Bihar, El Gran Braulio ikuskizuna hartuko du Algortako San Nikolas plazak, Adrian Conderen eskutik. 18:00etan hasiko da emanaldia. Igandean, aldiz, aztiek binaka jardungo dute. Hain zuzen, Tor eta Txoborro magoak elkarlanean arituko dira, euskaraz, Andra Mariko frontoian, 19:00etan.

Magipoteo emanaldiarekin hasi zen atzo jaialdia. Kalean, hainbat magoren erakustaldi motzak ikusi ahal izan ziren. Horietan egon ezin izan zutenek, halere, igandean joateko aukera izango dute: Txoborro eta Taylor magoak arituko dira, 12:30ean, Borobila plazan eta Tamarindo kalean. Jende artean ibiliko dira magia trikimailuak egiten, eta hara joandakoek gertutik ikusi ahal izango dituzte.

Getxo Magik

Igandera arte, Getxon (Bizkaia).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna