VOYEUR ENEA

Bachata guztiak ez baitira berdin

Gorka Erostarbe Leunda -

2018ko irailak 22
Hogeita bost urte elkarrekin igaro ondoren, banatzea erabakiko dute Marcosek (Ricardo Darin) eta Anak (Mercedes Moran) El amor menos esperado filmean. Ez dute ageriko arrazoirik bizikidetza eteteko; errutinaren gurpilak bizipoza ostu die. Beste munduko arazorik ez duen bikote bat da.

Las herederas lanean, Chela (Ana Brun) eta Chiquitaren (Margarita Irun) arteko bikote harremana hondatzen ari da, batez ere haien egoera ekonomiko zailari aurre egiteko oinordekotzan jasotako ondasunak saltzen hasi zirenetik. Ez dute beraiek erabaki banatzea. Chiquita, bien arteko dinamikoena, espetxeratu egingo dute, iruzurra leporaturik.

Marcos eta Ana bizitza berregiten saiatuko dira, nor bere aldetik. Ez dute eragozpenik jende berria ezagutzeko, nork bere uneko desioak gorpuztu ahal izateko. Harreman berriek ez dituzte asebeteko; nahi bezala aldatu ahal izango dute aukeraz, ordea. Nekez agertuko dira pasio horien eszenak filmean; musu eta besarkada konbentzional gutxi batzuk.

Chiquita emakumeentzako presondegian dago, hango girora nola hala egokituz. Chelak bertan behera utzi beharko du burges txikiaren bizitza, eta andrazko aberats helduentzako taxilari hasiko da. Desio ezezagun bat sentituko du haietako baten alaba gaztearekiko, eta zinemagileak ausardiaz erakutsiko du desio hori; adineko emakumea masturbatu egingo da sekuentzia batean.

Anak Marcosi esango dio «Borges eta Freud gutxiago, eta bachata gehiago». Lehen filmak badu bachata. Bigarrenak ere bai, espetxean dantzatzen baitute. Baina bigarrenak Borges eta Freud ere biltzen ditu, besteak beste. Ana eta Marcos elkarrengana itzuliko dira; Chelak ihes egingo du.

Lehenak Sail Ofiziala estreinatu du. Bigarrena Horizontes Latinosen eman dute. Bachata guztiak ez dira berdin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna