KRITIKA. Donostiako 80. Musika Hamabostaldia

Aintza

Marta Garcia -

2019ko abuztuak 14

Musika Aitzaki Zikloa. Capilla Santa Maria

Parte hartzaileak: Carlos Mena (kontratenorra), Daniel Zapico (tiorba), Carlos Garcia-Bernalt (organoa). Egitaraua: Soli Deo Gloria: Purcell, Monteverdi, Buxtehude, Schutz, Arauxo eta abarren obrak. Lekua: Estibalizko Andre Mariaren santutegia (Araba). Eguna: Abuztuak 12.

Carlos Mena gasteiztarrak zuzentzen duen Capilla Santa Mariak XVII. mendeko musikaz bete zuen Estibalizko Andre Mariaren eliza, tiorban Daniel Zapico eta organo positiboan Carlos Garcia-Bernalt lagun zituela. Menak berak azaldu bezala, programaren izenak —Soli Deo Gloria— gogora ekartzen du konpositore barrokoek euren obren bukaeran apaltasuna azaltzeko maiz idazten zuten esaera: «aintza jainkoari soilik» (eta ez, hortaz, konpositoreari edo musikariari). Programa osatzen zuten lau multzoek Ingalaterra, Italia, Alemania eta Espainia barrokoan barrena bidaia egiteko aukera eman zuten, garaiko hizkuntza nagusietan jainkoari laudorioa egiten dioten obrak eskainiz. Menaren eskariari men eginez, publikoak soilik haien bitartean egin zuen txalo.

Atal instrumentalari dagokionez, Zapicoren tiorbak berebiziko hornidura eta distirak utzi zituen agerian G. B. Vitaliren Tocatta e Bergamasca-n. Organo positiboan, Garcia-Bernalt ez zen soilik sostengu egonkorra izan: zehaztasuna eta espresioa batzen dituen edertasunaren eramaile bihurtu zen.

Idolatriara hurbiltzearen arriskuen kontzientziaz diot Carlos Menak errepertorio honen gainean dituen ezagutza eta ulermen zabalak benetan zoragarriak direla, baita horien interpretazioan hain beharrezkoak diren eta berak sobera erakusten dituen dotorezia eta samurtasuna ere. Hala gertatu zen, esaterako, Jose de Torresen Flavescite Serenate koloretsuan, eta baita D. Buxtehuderen Klaglied atsekabez betean, bularreko ahotsetik falsettora naturaltasun miresgarriaz igaroz. Bertaratuen bukaerako txalo-zaparradak kontzertua biribildu zuten bi bis deitu zituen: J. S. Bach-en Gott hat alles wohlgemacht aria (BWV 35 kantatatik) eta G. F. Sancesen Stabat Mater-etik Pianto della Madonna.

Hitz gutxitan, emanaldia bera gozamen handikoa izan zen, bai burutsu aukeratutako errepertorioagatik, bai horren gauzatze bikainagatik. Euren instrumentuetan maisu, hiruron artean ensemble ezin hobea osatu zuten, guztiz orekatua eta elkarrekiko harreman finean. Aintza Capilla Santa Mariari ere.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna