Mendebaldeko Saharan sartzea debekatu diete lau parlamentariri

Astebeteko lan bisita bat egitera joanak ziren Eusko Legebiltzarreko kideak. Fronte Polisarioko eta giza eskubideen aldeko aktibistekin bildu nahi zuten
Estarrona eta Barrio.
Estarrona eta Barrio. ELVIRA URQUIJO / EFE

Paulo Ostolaza -

2019ko abenduak 3
Eusko Legebiltzarreko lau legebiltzarkideri Mendebaldeko Saharan sartzea debekatu zien Marokok herenegun. Astebeteko lan bisita bat egitera zihoazen Carmelo Barrio (PP), Iñigo Martinez (Elkarrekin Podemos), Eva Juez (EAJ) eta Josu Estarrona (EH Bildu), baina, hegazkina Aaiungo aireportuan lurreratu orduko, Marokoko Gobernuko kide batek esan zien ezin zirela hegazkinetik jaitsi. Ez da halako bisita batean lurralde okupatuan sartzen uzten ez dieten lehen aldia. Hegazkinak Las Palmasera (Kanaria Handikoa) itzuli behar izan zuen, eta ordezkaritza Euskal Herrira itzuli zen atzo.

Legebiltzarreko Bakea eta Askatasuna lantaldeko kideen asmoa zen Fronte Polisarioko ordezkariekin eta giza eskubideen aldeko elkarteetako kideekin hitz egitea. Talde horrek 1991. urtetik du harremana SEAD Saharako Errepublika Arabiar Demokratikoko ordezkariekin. Egonaldia lau politikariekin batera egitekoa zen Nezha Khalidi kazetari eta aktibista sahararra; aurten Marokok haren aurka egina duen epaiketa batek oihartzun handia izan du nazioartean.

Herenegun zabaldutako ohar batean, EAJk salatu egin zuen Marokok «herri sahararraren errealitatea bahitzeko egindako saialdia». Jeltzaleek «gardentasun falta» egotzi zioten Marokoko Gobernuaren jarrerari. Espedizioko koordinatzaileak, PPko Carmelo Barriok, esan zuen bere alderdian gai horren inguruan «jarrera oso pluralak» daudela, bai eta «Euskadin» Mendebaldeko Sahararekiko elkartasuna «oso indartsua» dela ere. Espainiak afera horretan duen jarrera da Saharako ekintzaileen salaketa nagusietako bat. Juan Karlos Izagirre EH Bilduko kideak ardura hori euren gain hartzeko eskatu zien Eusko Legebiltzarrean ordezkaritza duten alderdi espainiarrei: «Eskaera bat PSOE, PP eta Podemosi: bideratu ezazue behingoz deskolonizazioa Saharan; zuen ardura da».

Bidaiak zeresana eman du aurten, Fronte Polisarioak Aljerian dituen kanpamentuetara bidaiatzea «arriskutsua» dela ohartarazi baitzuen Espainiako Gobernuak joan den astean. NBE Nazio Batuen Erakundeak eta Fronte Polisarioak, ordea, gezurtatu egin zuten Madrilek esandakoa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna