Definiziorik gabeko edertasuna

Jakub Jozef Orlinski & Il Pomo D'Oro

Azken urteotan badirudi kontratenorrak ugaritu egin direla musika klasikoaren zirkuituan eta, orokorrean, esan genezake ahots horien berezitasuna biziki estimatua dela zaleen artean. Jakub Josef Orlinskiren karrera arrakasta horren eredu argia da, bere karisma eta gertutasunak bat egiten baitu bere dantza eta musika gaitasunekin. Bira honetan, kontratenor poloniarra Il Pomo D'Oro taldearekin aritu da, hain zuzen ere, duela lau urte argitaratutako Facce d'amore (Maitasun-aurpegiak) diskoa aurkezteko, bere bigarren lana bakarlari gisa. Amodioaren inguruko programa izanik, ahotsaren zein instrumentuen espresio baliabideez gozatzeko aukera zabaltzekoa zen asteazkenean, maitatua izatearen bozkarioan zein pasio gordinaren eroaldietan murgiltzeko aitzakia.

Esango dut Orlinskiren emisioa ez dela guztiz erregularra: definizio falta antzematen da koloraturen ebazpenetan nahiz bokalen argitasunean, eta goiko eta beheko erregistroak guztiz bereiziak ditu. Gabezia horiek nabarmenak izan ziren, esaterako, F. B. Contiren Odio, vendetta, amor arian. Il Pomo d'Oro osatzen duten musikarien akonpainamendua ez zen, gainera, lagungarria izan. Taldeak ibilbide oparoa egin du 2012an sortu zenetik, baina programa honetan astunegia izan zen soinua, beteegia, barrokoan hain funtsezkoa den arnasa faltan. Hari gehiegi egoteaz gain, haizeak, kolore fina bazuten ere, ozenegi aritu ziren G. F. Haendelen Pena tiranna arian.

Hala ere, Orlinskiren ahotsak baditu entzulea ezinbestean erakartzen dituen tasunak, kontzertuan ere oso presente egon zirenak: tinbre benetan ederra, dinamikak gidatzeko eta zabaltzeko erraztasuna, eta, oro har, musikaren norabidea eta helmugak zein diren adierazteko maisutasuna. G. Bononciniren La costanza non gradita operako Infelice mia costanza zein G. M. Orlandiniren Nerone operako Che m'ami ti prega arietan marraztutako kadentziak horien erakusgarri izan ziren. Oztopoak oztopo eta zehaztasun faltaren gainetik, freskotasuna eta sen ona azaleratu ziren eszenatokian.