Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

Koronabirusa. GIZARTEA PENTSALDIAN

Etxekotuak

Idurre Eskisabel - EHUko irakaslea

2021eko otsailak 12

Ez da kontu berria. Aspaldi da Ikean ohe eta armairuez gain iragarki xaloz mozorrotutako konbentzimendu bat erosi genuela: etxea dela gutako bakoitzaren errepublika independentea. Etxea dugula euritik eta hotzetik babesteko aterpe ez ezik kale arriskutsutik eta bestearen mehatxutik gordetzeko gune bakarra ere. Aspaldi da askatasuna etxeko hormen artean kaiolatu genuela, nor izatea bakoitzaren erosahalmenak baldintzatutako metro koadro kopurura murriztu genuela.

Ez da kontu berria, ezta ere, hedabide salduenetan (hots, erosienetan) kazetaritza zuzenaren arauek agindutakoak urratuz gertatzea lapurreta, eraso eta herritar xumeen arteko orotariko liskarren berri: kontakizuna puztuz, garrantzia biderkatuz, egiturazko elementuak ezkutatuz. Aspalditik, gertakari hutsal izendatutako albisteetan ideologia gehiago isurtzen da politikakoetan baino. Hondoko ideologia gogorra: kalea mehatxua da; hurkoa, bestea, beti erasorako prest den etsaia.

Akaso, berrixeagoa da gure etxeak kamera eta alarma bidez gotortzeko deia egiten diguten iragarkien etengabeko errepika (securitas, securitas, securitas). Berrixeagoa den bezala sofatik mugitu gabe nahierara entretenitzeko ez ezik munduarekin harremanetan jartzeko are, mundua nahierara eratzeko askotariko eduki pantailaratuen eskaintza ere.

Alegia, aspaldi hasi genuela etxekotze masiboa, kalearen galera. Arestian zirriborratutako bi zutoinen gainean: batetik, besteengan, etengabe, mehatxua ikustea. Bestetik, geure zilborretik apenas aldendu gabe astia (denbora, bizitza) betetzeko trepeta mordoa.

Lehendik horixe zen joera, eta, orain, izurriarekin, bider hamaika. Denok kutsatzaile eta denok mehatxu garen heinean, erabat lausotu zaigu hurkoa. Etxekotzea norberarentzako babeslekuaz gain ardura zibikoaren eredu eta arau bihurtu da. Azken batean, normalitate berriak asko du jendeon egunerokotasuna erregulatzeko arauen ugaritze eta gogortzetik ez dator alferrik normalitatea latinezko norma-tik. Helburu eta zeregin zehatz eta jakinez baino ez zaigu arauzko etxetik ateratzea: lanerako, kontsumorako, kirolerako... Errendimendurako.

Inoiz baino susmagarriagoa zaigu besterik gabe kalean ibiltzea, are, egotea —galdetu, bestela, Donostiako Trinitateko gazteei—. Eta kalea dugu hurkoarekin ez ezik bestearekin topo egiteko lekurik behinena ere, ni-az eta gu-az bestekoa hezur-haragiz ezagutu eta bizitzekoa. Ondorioz, aurreiritziak arrakalatzekoa, telebizitzak eta algoritmoek etengabe elikatzen duten pentsamendu bakarrerako joera autozilbortua zapartatzekoa. Askatasunaren eta erabakimenaren egiazko probalekua.

Noizbait ebatziko dugu gainditu dugula pandemia... Honek guztiak zokorik barnekoenetan zizelkatu dizkigun beldur, aztura, arau eta egiteko zein izateko molde berriak gaindituko ote ditugun, hortxe zalantza.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

<b>Gotzone Sagardui.</b> Osasun sailburua, atzo, Gobernu Kontseiluaren ostean egin zuten agerraldian. ©J. FONTANEDA / FOKU

Datu «txarrak» direla eta, osasun larrialdia ezarriko du berriz Jaurlaritzak

Berria

Espainiako Auzitegi Gorenak onetsi egin du Araba, Bizkai eta Gipuzkoan osasun ziurtagiria erabiltzea. Ziurtagiria datuak apaltzeko «tresnetako» bat izango dela dio Urkulluk A. Iraola - J. Ordoñez- J. Senar
Garbiñe Ubeda, Paula Kasares eta Kike Amonarriz, atzo, Andoainen, Martin Ugalde foroan. ©JON URBE / FOKU

Hitzekin batera, haien balioa

Maddi Ane Txoperena Iribarren

Gurasoen hizkuntza jarreren garrantziaz aritu dira Kasares eta Amonarriz Martin Ugalde foroan
Emakume bat Soweton, Johhanesburgon, atzo. Omikron aldaeraren kasuak agertzen hasiak dira mundu osoan. ©K. L. / EFE

EMAk iragarri du hiru hilabete beharko direla aldaera berrirako txertoak onesteko

Arantxa Elizegi Egilegor

Austriak datorren astean aurkeztuko du nahitaezko txertaketa ezartzeko lege proposamena. Baliteke Alemaniak ere bide beretik jotzea

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.